ފިޔާ ސައޭ ބުނުމުން ގިނަ ބަޔަކަށް ހައިރާންކަން ލިބިދާނެ އެވެ. މީގެ ކުރިން އިނގުރު ސައާއި ލޮނުމެދު ސައިގެ ވާހަކަ އަޑު އިވިފައި އޮތުން ގާތެވެ. ފިޔާ ސައަކީ ވެސް ހަށިގަނޑަށް ފައިދާތަކެއް ލިއްބައިދޭ ސައެކެވެ.

އެގޮތުން ފިޔާ ސަޔަކީ ވެސް ދިފާއީ ނިޒާމު ވަރުގަދަކޮށްދޭ އެއްޗެކެވެ. ފިޔަ އަކީ އޭގެ ގަދަ ވަހާ ހެދި ބައެއް މީހުން އެހާ ގަޔާވާ އެއްޗަކަށް ނުވެ އެވެ. އެކަމަކު މިއީ އެކި ކަންކަމަށް ލިބިދޭ ސިއްހީ ފައިދާތަކަށް ބަލާއިރު އެއް ވަނައިގެ އެއްޗެކެވެ.

ސިއްހީ ތަޖުރިބާކާރުން ވިދާޅުވާ ގޮތުގައި ފިޔާ އަކީ ދިފާއީ ނިޒާމު ވަރުގަދަކުރުމަށް ބޭނުންވާ މާއްދާތަކެއް އެކުލެވޭ އެއްޗެކެވެ. އޭގެ ތެރޭގައި ވިޓަމިން ސީ އާއި މެގްނީޒިއަމާއި އަޔަން އާއި ޒިންކާއި އެންޓިއޮކްސިޑަންޓްތައް ހިމެނެ އެވެ.

ފިޔާ އިން ސައި ހަދާ ނަމަ ފުރަތަމަ ފެން ހޫނުކުރާށެވެ ދެން ކޮށާފައި ހުރި ފިޔާ އޭގެ ތެރެއަށް އަޅާފައި ތާސީރުގަނޑު ފެނުގެ ތެރެއަށް ދާހާ އިރުވަންދެން ކައްކާނީ އެވެ.

ގާތްގަނޑަކަށް 15-20 މިނިޓަށް މަތި ޖަހާފައި ކައްކާ އިރު، ބޯ އިރު ރަހަ އިތުރަށް ރަނގަޅުކޮށްލަން އަސޭމިރުސް އޮށާއި ކާފޫރުތޮޅި އާއި ދިރި ވެސް ބޭނުން ކުރެވިދާނެ އެވެ. މި އެއްޗެހި އަޅާފައި ކެއްކުމަށް ފަހު ފުރާނާލާށެވެ. ދެން ބޯ އިރު މާމުއިފޮދެއް ނުވަތަ ލުނބޯ ހުތް ވެސް ބޭނުންކޮށްލެވިދާނެ އެވެ. ފިޔާގެ ތޮށިން ވެސް ސައި ހަދާ ނަމަ ހަމަ ކުރިން ބޭނުންކުރި އެއްޗެހި ހަމަ އެގޮތަށް ބޭނުން ކުރެވިދާނެ އެވެ.

ފިޔާ ސައި އާންމުކޮށް ބޯން އާދަކޮށްފި ނަމަ ދިފާއީ ނިޒާމު ވަރުގަދަކޮށްދީ ބަލިތަކުން ރައްކާތެރިކޮށް ދޭން އެހީވެދޭނެ ކަމަށް ސިއްހީ މާހިރުން ވިދާޅުވެ އެވެ.