އެމެރިކާގެ މަޝްހޫރު ލަވަކިޔުންތެރިޔާ ޓޭލާ ސްވިފްޓް ފީޗާ ފިލްމެއް ޑައިރެކްޓްކުރަން ތައްޔާރުވަމުންދާ ކަމަށް ރިޕޯޓްތައް ބުނެފި އެވެ.

ހޮލީވުޑް ހަބަރުތައް ގެނެސްދޭ މީޑިއާތަކުގައި ރިޕޯޓްކޮށްފައިވާ ގޮތުގައި ޓެއިލާ ސްވިފްޓް ހޮލީވުޑްގެ ފިލްމެއް ޑައިރެކްޓް ކުރުމަށް ތައްޔާރުވަމުން އަންނަ ކަމަށެވެ. އެގޮތުން އެ ފިލްމު ޕްރޮޑިއުސް ކުރާނީ ސާޗްލައިޓް ޕިކްޗާޒް އިނެވެ.

މިކަމާ ގުޅޭ ގޮތުން ސާޗްލައިޓް ޕިކްޗާޒްގެ ރައީސުން ކަމަށްވާ ޑޭވިޑް ގްރީންބޯމް އާއި މެތިއު ގްރީންފީލްޑް ނެރުނު ބަޔާނެއްގައި ބުނީ ޓޭލާގެ އަލަތު ފީޗާ ފިލްމަކީ އޭނަ ލިޔެ، ޑައިރެކްޓްކުރާ އެއްޗެއް ކަމަށެވެ.

އެ ފިލްމްގެ ޕްލޮޓް އަދި ކާސްޓް ފަދަ ތަފްސީލްތައް ހާމައެއް ނުކުރެ އެވެ. މިދިޔަ އަހަރު ޓެއިލާ ވަނީ 15 މިނެޓުގެ ކުރު ފިލްމެއް ލިޔެ ޑިރެކްޓުކޮށްފަ އެވެ.

"އޯލް ޓޫ ވެލް" ގެ ނަން ދިން އެ ފިލްމު ބޭނުން ކުރީ އޭނާ 2012 ވަނަ އަހަރު ނެރުނު ލަވަ އަލުން ރެކޯޑްކޮށް، އޭގެ ވީޑިއޯގެ ގޮތުގަ އެވެ.

އޭގެ އިތުރުން ޓެއިލާގެ ގިނަ މިޔުޒިކް ވީޑިއޯތައް އުފެއްދުމުގައި ވެސް އޭނާގެ ބައިވެރިވުން ބޮޑެވެ. އޭނާއަކީ މިހާރު ދުނިޔޭގެ އެންމެ ކާމިޔާބު އެއް އާޓިސްޓެވެ.

ޓެއިލާއަށް 11 ގްރެމީ އެވޯޑް ލިބިފައިވާ އިރު، އެމްޓީވީ މިޔުޒިކް ވީޑިއޯ އެވޯޑްސްގައި އެންމެ މޮޅު ޑިރެކްޝަންގެ ގޮތުގައި ދެ ފަހަރު އެވޯޑް ހޯދި ހަމައެކަނި ސޯލޯ އާޓިސްޓަކީ އޭނާ އެވެ.

އުމުރުން 32 އަހަރުގެ ޓޭލާ ފީޗާ ފިލްމެއް ހަދަން ތައްޔާރުވިކަން އިއުލާންކޮށްފައި މި ވަނީ ފީޗާ ފިލްމު ޑައިރެކްޓްކުރުމަކީ އަމާޒެއް ކަމަށް މީގެ ތިން މަހެއްހާ ދުވަސް ކުރިން ދިން އިންޓަވިއުއެއްގައި ބުނެފައި ވަނިކޮށެވެ.