އަންނަ އަހަރު ބާއްވާ ރިޔާސީ އިންތިހާބުގެ ސެކިއުރިޓީ ބެލެހެއްޓުމާ ގުޅޭގޮތުން އިލެކްޝަންސް ކޮމިޝަން (އީސީ)ން ދިވެހި ފުލުހުންގެ ހިދުމަތާއެކު މަޝްވަރާކޮށްފި އެވެ.

ފުލުހުންގެ އިސްކަންދަރު ކޮށީގައި ކުރިއަށް ގެންދިޔަ މަޝްވަރާތަކުގައި އިލެކްޝަންސް ކޮމިޝަންގެ ރައީސް ފުއާދު ތައުފީގުއާއި ކޮމިޝަންގެ މެންބަރުންނާއި ކޮމިޝަނާ އޮފް ޕޮލިސް މުހައްމަދު ހަމީދުއާއި ފުލުހުންގެ އިސްވެރިން ބައިވެރިވެވަޑައިގެންނެވި އެވެ.

އިލެކްޝަންސް ކޮމިޝަނުން ބުނީ މިބައްދަލުވުމަކީ ކޮމިޝަނުގެ ބައެއް މަސައްކަތްތަކާއި ގުޅިގެންނާއި، ރިޔާސީ އިންތިހާބުގެ ސަލާމަތީ ކަންކަމާ ގުޅުންހުރި ކަންކަމުގައި މަޝްވަރާކޮށްލުމަށް ބޭއްވި ބައްދަލުވުމެއް ކަމަށެވެ.

އެގޮތުން، ރިޔާސީ އިންތިޚާބުގެ ސަލާމަތާއި ރައްކާތެރިކަން ކަށަވަރުކުރުމާއި އިލެކްޝަން ކޮމިޝަނުން ފުލުހުންގެ ފަރާތުން ބޭނުންވާ ސެކިއުރިޓީ ދިނުމާ ގުޅޭގޮތުން މަޝްވަރާކުރެއްވި އެވެ. އަދި ރިޔާސީ އިންތިޚާބުގެ އެކި ކަންކަމުގައި އިލެކްޝަން ކޮމިޝަނުން ފުލުހުންގެ ފަރާތުން ބޭނުންވާ އެހީތެރިކަން ދިނުމަށްވެސް އެ ބައްދަލުވުމުގައި މަޝްވަރާކުރެއްވި އެވެ.

ރިޔާސީ އިންތިހާބު ބާއްވާނެ ތާރީހެއް އިލެކްޝަންސް ކޮމިޝަނުން އަދި އިއުލާންކޮށްފައެއް ނުވެ އެވެ. ނަމަވެސް ރިޔާސީ އިންތިހާބުގެ މަސައްކަތްތައް ކުރިއަށް ގެންދާނެ ގޮތުގެ ތާވަލެއް ކޮމިޝަނުން މިހާރު ވަނީ އެކުލަވާލާފަ އެވެ.

ރިޔާސީ އިންތިހާބަށް ޕާޓީ ތަކުންވެސް މިހާރު ދަނީ ތައްޔާރުވަމުންނެވެ. އެގޮތުން ޕީޕީއެމް އިން ރައީސް ޔާމީނަށް ރިޔާސީ ޓިކެޓް ދީފައިވާއިރު އެމްޑީޕީއާއި އެމްއެންޕީން ގެންދަނީ ޕްރައިމަރީއަށް ތައްޔާރުވަމުންނެވެ.