2018 ވަނަ އަހަރު މަރާލާފައިވާ ވޮޝިންގްޓަން ޕޮސްޓުގެ ނޫސްވެރިޔާ ޖަމާލް ހަޝުގްޖީގެ މަރުގެ މައްސަލައިގައި ތުހުމަތު ކުރެވޭ 8 މީހެއްގެ މައްޗަށް ކުށް ސާބިތުވެ، 20 އަހަރަށް ޖަލަށް ލާން ސައުދީގެ ކޯޓަކުން ހުކުމް ކޮށްފި އެވެ.

ސައުދީ ޕްރެސް އެޖެންސީ (އެސްޕީއޭ) އިން ޕަބްލިކް ޕްރޮސެކިއުޓާގެ ތަރުޖަމާނާއި ހަވާލާދީ ރިޕޯޓުކޮށްފައިވާ ގޮތުގައި އޭގެ ތެރެއިން އެކަކުގެ މައްޗަށް 10 އަހަރުގެ ޖަލު ހުކުމެއް އިއްވާފައިވާ އިރު، އިތުރު ދެ މީހަކަށް އިއްވާފައިވަނީ 7 އަހަރުގެ ޖަލު ހުކުމެކެވެ.

މި މައްސަލައިގައި ދައުވާ އުފުލާފައިވާ ފަސް މީހަކަށް ހަޝުގްޖީގެ އާއިލާއިން މައާފު ދިނުމުގެ ސަބަބުން މަރުގެ ހުކުމް އިއްވާފައެއް ނުވެ އެވެ. އެ ފަސް މީހުންނަށް އިއްވާފައިވަނީ 20 އަހަރުގެ ޖަލު ހުކުމެކެވެ.

މ ޝަރީއަތް ކުރިއަށް ދިޔަ ގޮތާއި މެދު ބައިނަލްއަގްވާމީ ޖަމްއިއްޔާތަކުން ވަނީ ވަރަށް ބޮޑަށް ފާޑު ކިޔާފަ އެވެ. އަދި މިއީ "އިންސާފަށް ހަޖޫޖެހުމުގެ" އަމަލެއްގެ ގޮތުގައި ސިފަކޮށްފައިވެ އެވެ.

"ހަޝުގްޖީ މަރާލުމުގައި އަމަލީ ގޮތުން ބައިވެރިވި 5 މީހުންނަށް އެވަނީ 20 އަހަރު ދުވަހުގެ ޖަލު ހުކުމެއް އިއްވާފަ. އެހެން ނަމަވެސް މިކަމުގެ އަޑީގައި ތިބި ބޮޑެތި "ބޭފުޅުން" އެންމެ ފުރަތަމަ ދުވަހުން ފެށިގެންވެސް ތިބީ މިނިވަނުންގެ ގޮތުގައި. އެއްވެސް ތަހުގީީގެއްގައި ވެސް ޝަރީއަތެއްގައި ވެސް އެއިން މީހެއްގެ ނަންވެސް އައިސްފައި ނުވޭ،" ޔުއޭން ސްޕެޝަލް ރަޕޮޓާ ފޯ އެކްސްޓްރާ ޖުޑިޝަލްކިލިންގްސް، އެގްނީސް ކަލަމާޑް ވިދާޅުވި އެވެ.

އޭނާ ވަނީ ހަޝުގްޖީގެ މަރުގެ މައްސަލައިގެ މިނިވަން ތަހުގީގެއް ހިންގުމުގައި އިސްކޮށް ހަަރަކާތްތެރި ވެފަ އެވެ.

ވޮޝިންގްޓަން ޕޯސްޓުގެ ނޫސްވެރިޔާ އަދި ސައުދީގެ ޝާހީ އައިލާއަށް ވަރަށް ބޮޑަށް ފާޑުކިޔަމުން ދިޔަ ހަޝުގްޖީ މަރާލާފައިވަނީ 2018 ވަނަ އަހަރުގެ އޮކްޓޯބަރު މަހުގެ ދެވަނަ ވަނަ ދުވަހު، ތުރުކީގެ ވެރިރަށް އިސްޓަންބުލްގައި ހުންނަ ސައުދީ ކޮންސިއުލޭޓް ތެރޭގަ އެވެ. އޭނާ އެތަނަށް ދިޔައީ ކަައިވެނި ކުރަން ބޭނުންވާ ލިޔެކިޔުންތަކެއް ހޯދަންވެގެންނެވެ.

ބުނެވޭ ގޮތުގައި ހަޝުގްޖީ މަރާލާފައިވަނީ ސައުދީގެ ވަލީ އަހުދު މުހައްމަދު ބިން ސަލްމާންގެ އަމުރުފުޅަށެވެ.