ބިގްބޮސް ހަތެއް ކާމިޔާބުކުރި އިންޑިއާގެ ފިލްމީ ތަރި ގޯހަރް ޚާން އާއި އެކްޓަރު އަދި ނެށުންތެރިޔާ، ޒައިދު ދަރްބާރް އަށް ދަރިއަކު ލިބެން އުޅޭކަން އިއުލާން ކޮށްފި އެވެ.

ގޯހަރް އާއި ޒައިދު ކައިވެނިކުރީ ޑިސެމްބަރު 25، 2020 ވަނަ ދުވަހު އެވެ. އެ ދެމަފިރިން ދާދިފަހުން ވަނީ އެ މީހުންގެ ކައިވެންޏަށް ދެ އަހަރު ފުރުން ފާހަގަ ކޮށްފަ އެވެ. އަދި މިއަހަރު އެ ދެމަފިރިން ދާދި ފަހުން ވަނީ މައްކާއަށް ގޮސް އުމުރާގެ އަޅުކަން ވެސް ފުރިހަމަ ކޮށްފަ އެވެ.

ގޯހަރު އިންސްޓަގްރާމްގައި ކޮށްފައިވާ ޕޯސްޓެއްގައި ބުނެފައިވަނީ އެ އެއާއިލާ އަށް ލިބޭ އުފަލުގައި ބައިވެރިވެ ހެޔޮދުއާ ކޮށްދިނުމަށް އެދޭ ކަމަށެވެ.

މީގެ ކުރިން ދިން އިންޓަވިއުތަކުގައި ގޯހަރު އެކި ފަހަރު މަތިން ވަނީ ދަރިއަކު ބޭނުން ކަމަށް ބުނެފައި އެވެ. އަދި މަންމައަކަށް ވުމަކީ ލިބޭނެ އެންމެ ބޮޑު އުފާކަމަށް ވެސް އޭނާ ވަނީ ބުނެފައި އެވެ.

ޒައިދަކީ ޑައިރެކްޓަރް ސަންޖޭ ލީލާ ބަންސާލީ 1999 ގައި ގެނެސްދިން ކާމިޔާބު ފިލްމު "ހަމް ދިލް ދޭ ޗުކޭ ސަނަމް" އާއި 2002 ގެ "ދޭވްދާސް" ގެ މިއުޒިކް ޑައިރެކްޓަރް އިސްމާއީލް ދަރްބާރްގެ ދަރިއެކެވެ.

ގޯހަރް، 37، ކުޅެފައިވާ ބައެއް ފިލްމުތަކުގެ ތެރޭގައި "އިޝަގްޒާދޭ" އާއި "ފީވާ" އާއި "ބޭގަމް ޖާން" ހިމެނެ އެވެ.