ބޮލީވުޑްގެ މަޝްހޫރު ތަރި ޝާހްރުކް ޚާން އަށް ފޭނަކު ކުރި ސުވާލަކަށް ދިން ޖަވާބުން ގިނަ ބައެއްގެ ތައުރީފު ޝާހުއަށް ލިބެން ފަށައިފި އެވެ.

ޝާހު ވަނީ މިއަހަރުގެ ކްރިސްމަސްއާ ގުޅިގެން "އާސްކް މީ އެނީތިން" ނަމުގައި އޭނާއަށް ކޮންމެ ސުވާލެއް ވެސް ކުރެވޭނެ ފުރުސަތު ހުޅުވާލާފަ އެވެ. އެއާއެކު ޝާހުގެ ގިނަ ފޭނުން ދަނީ ސޯޝަލް މީޑިއާގައި އޭނާއަށް ސުވާލުތައް އަމާޒުކުރަމުންނެވެ.

އެގޮތުން ފޭނަކު ވަނީ ޝާހުގެ ކުރިއަށް އޮތް ފިލްމު ކަމަށްވާ "ޕަތާން"އާ ގުޅިގެން ޝާހުއާ ސުވާލުކޮށްފަ އެވެ. އޭނާ ކުރި ސުވާލުގައި ޝާހުއަށް ޓެގު ކުރަމުން ފިލްމުގެ ޓްރެއިލަރު ރިލީޒް ނުކުރަނީ ކީއްވެތޯ ވަނީ އަހާފަ އެވެ.

އެ ސުވާލަށް ދިން ޖަވާބުގައި ޝާހު ބުނީ، ޓްރެއިލަރު ނެރޭނީ، އޭނާ ބޭނުންވާ އިރެއްގައި ކަމަށެވެ. މި ޖަވާބާއެކު ގިނަ ބަޔަކު ދަނީ ޝާހުގެ އެ އަންދާޒަށް ތައުރީފު ކުރަމުންނެވެ.

މި ފިލްމުގެ ޓްރެއިލާ ބަލާހިތުން ބެލުންތެރިން ތިއްބާ ފިލްމުގެ ފުރަތަމަ ލަވަ މިމަހުގެ 12 ގައި ވަނީ ބެލުންތެރިންނަށް ދޫކޮށްލާފަ އެވެ.

"ޕަތާން" އަކީ 2019 ވަނަ އަހަރު ދެއްކި އެންމެ ކާމިޔާބު ބޮލީވުޑް ފިލްމު ކަމަށްވާ "ވޯ" ގެ ޑައިރެކްޓަރު ސިދާތު އާނަންދު، ޔާޝްރާޖް ފިލްމްސް، ވައިއާރްއެފް އަށް ހަދާފައިވާ ފިލްމެކެވެ. މީގެ ވިލަންގެ ރޯލުން ފެންނާނީ ޖޯން އަބްރަހެމެވެ.

އަށް ގައުމެއްގައި ޝޫޓްކޮށްފައިވާ "ޕަތާން" އަކީ 2018 ވަނަ އަހަރު ދެއްކި ބޮޑު ފްލޮޕް "ޒީރޯ" އަށް ފަހު، ޝާހްރުކް ލީޑް ރޯލުކުޅޭ ފުރަތަމަ ފިލްމެވެ. މި ފިލްމުގައި ޝާހްރުކް ފެންނާނީ ވެސް ވަރަށް ތަފާތު ލުކެއްގަ އެވެ.