ވަގު ހިފުމަށް ކުރާ މަސައްކަތް ހުއްޓައެއް ނުލާ ކަމަށް ރައްޔިތުންގެ މަޖިލީހުގެ ދާންދޫ ދާއިރާގެ މެމްބަރު ޔައުގޫބް އަބްދުﷲ ވިދާޅުވެއްޖެ އެވެ.

މެމްބަރު ޔައުގޫބު މިހެން ވިދާޅުވީ ދިވެހިރާއްޖޭގެ އަޑުން ރޭ ގެނެސްދޭ "އަހާށޭ ބުނާނަން" ޕްރޮގްރާމްގައި އާއްމު ފަރާތަކުން ހުށައެޅި ސުވާލަކަށް ޖަވާބު ދެއްވަމުންނެވެ.

އާއްމު ފަރާތަކުން ވަނީ ރައްޔިތުންގެ މަޖިލީހަށް ވަޑައިގަންނަވަނީ ވަގުން ހިފަން ކަމަށް ޔައުގޫބް ވިދާޅުވެފައިވާއިރު އެމްއެމްޕީއާރްސީގެ ޚިޔާނާތުގައި ހިމެނޭ އެމްޑީޕީގެ މީހުންގެ ނަންތައް ހާމަ ކުރުމަށް ބާރު ނާޅަނީ ކީއްވެތޯ ސުވާލު ކޮށްފަ އެވެ.

އެ ސުވާލާ ގުޅިގެން ޔައުގޫބް ވިދާޅުވީ މަޖިލީހުގެ ކެޕްމެއިން ތެރޭގައި ވަގުހިފަން މަޖިލީހަށް ވަޑައިގަންނަވާ ވާހަކަ ދެއްކެވީ ވަރަށް ވިސްނުމަށް ފަހުގައި ކަމަށެވެ. އިންސާނުންނަކީ ވަރަށް ހަނދާންބަލި ބައެއް ކަމަށާއި އޭނާގެ ފަރާތުން ވެސް އެފަދަ ކަމެއް ކުރިމަތިވެއްޖެނަމަ ރައްޔިތުން އެވާހަކަ ދައްކަމުން އޭނާގެ ފަހަތުން ދުވާނެ ކަމަށެވެ. އަދި އެކައުންޓަބްލް ކުރަން ފަސޭހަ ވާނެ ކަމަށެވެ. އަދި އޭނާ ވަގު ހިފަން ކުރާ މަސައްކަތް ހުއްޓާ ނުލާ ކަމަށް ވެސް އޭނާ ވިދާޅުވި އެވެ.

"އަޅުގަނޑު ކުރަމުންއައި މަސައްކަތެއް ހުއްޓައެއްވެސް ނުލަން. އެއްވެސް ފަރާތަކުން ޕްރެޝަރެއްވެސް ނާދޭ. އަޅުގަނޑު މަސައްކަތް ކުރަން. ބަޔަކަށް ނޭނގިދާނެ އަޅުގަނޑު މަސައްކަތް ކުރާ ކަމެއް. މަޖިލިސް މާލިއްޔަތު ކޮމިޓީގައި އެބައޮތް އެމްއެމްޕީއާރްސީގެ މައްސަލަ އޯޕަންކޮށް. މިއަދު ވެސް އެ މައްސަލައިގައި ކޮޅެއްގައި ނުޖެހެނީސް އަޅުގަނޑުމެން ކޭސް ކްލޯޒްއެއް ނުކުރާނަން. މޮނިޓާ ކުރާނަން. ސުޕަވައިޒް ކުރާނަން. އިދާރާތަކުން މަސައްކަތް ކުރިއަށް ގެންދަނީ ކިހިނެއްތޯ؟ މަސައްކަތް އެބަދޭ އެކަމަކު ތަންކޮޅެއް ލަސް،" ޔައުގޫބް ވިދާޅުވި އެވެ.

އޭނާ ވިދާޅުވީ އެމްއެމް ޕީއާރްސީ ޚިޔާނާތުގައި ހިމެނޭ މީހުންގެ ލިސްޓެއް ރައްޔިތުންގެ މަޖިލީހަކަށް އެ ލިސްޓެއް ލިބިފައި ނުވާ ކަމަށާއި، ލިބިއްޖެނަމަ އެ ލިސްޓު ހާމަ ކުރައްވަން ތާއީދު ކުރައްވާނެ ކަމަށެވެ.

އެމްއެމްޕީއާރްސީގެ މައްސަލައަކީ ދުނިޔޭގެ ނިސްބަތުން ވެސް ވަރަށް ބޮޑު މައްސަލައެއް ކަމަށާއި މިއީ އެކައުންޓް ތްރޫކޮށް ކޮށްފައިހުރި ގިނަ މުއާމަލާތުތަކެއް ނޫން ކަމަށާއި ގިނަފަހަރަށް ފިޒިކަލް ކޭޝްއިން މުޢާލަމާތު ކޮށްފައި ހުރުމުން އެއެއްޗެހި ހޯދަން ޓްރޭސްކުރުން އެއީ ފަސޭހަ ކަމެއް ނޫން ކަމަށް ޔައުގޫބް ވިދާޅުވި އެވެ.

މީގެ އިތުރުން އާއްމު ފަރާތަކުން ވަނީ ޖެނެރަލް އެކައުންޓިންގެ ދާއިރާއަށް ވުރެ ވަގުން ހިފަން ފަސޭހަވާނީ ފޮރެންސިކް އެކައުންޓިންގެ ދާއިރާއިން ކިޔަވައިގެން ކަމަށް ދެކެވަޑައިގަންނަވަންތޯ ވެސް އައްސަވައިފަ އެވެ.

އެ ސުވާލަށް ޖަވާބު ދެއްވަމުން ޔައުގޫބް ވިދާޅުވީ އެކައުންޓިންގެ ދާއިރާއިން ނުކިޔެވިޔަސް އަދި އޮޑިޓަރަކަށް ނުވިޔަސް ވަގު ހިފޭނެ ކަމަށެވެ. އެއީ އެއަށްވުރެ ސާފުކޮށް ކުރެވެން އޮތް ކަމެއް ކަމަށްވެސް ޔައުގޫބު ވިދާޅުވި އެވެ.