މިހާރު ކުރިއަށްދާ އެމްޑީޕީގެ ރިޔާސީ ޕްރައިމަރީގެ އިންތިހާބުގައި ލިސްޓުގައި ނެތް މީހުން ވޯޓު ލާ މައްސަލަތަކެއް ފެންމަތިވެ، ވޯޓުލުން ބައެއް ފޮށިތަކުގައި ހުއްޓުވައިފި އެވެ.

އެގޮތުން މާލޭގައި ބަހައްޓާފައިވާ ބައެއް ފޮށިތަކަށް ވޯޓުލާ މީހުންގެ ލިސްޓްގައި ނެތް މީހުން ވޯޓުލާ މައްސަލަތަކެއް ވަނީ ފެންމަތިވެފަ އެވެ. މިމައްސަލަތައް ފެންމަތިވެފައިވަނީ މާފަންނު ދެކުނު ދާއިރާގައި ބަހައްޓާފައިވާ ވޯޓު ފޮއްޓަކަށް ނަން ނެތް މީހަކު ވޯޓުލީ މައްސަލައާ ގުޅިގެން އެ ފޮއްޓަށް ވޯޓުލުން ވަނީ ހުއްޓުވާފަ އެވެ.

މި ވޯޓު ފޮށީ ހިމެނޭ ސަރަހައްދުގައި އެމްޑީޕީގެ ދެފެކްޝަނަށް ނިސްބަތްވާ މެމްބަރުން އެބަ ތިއްބެވެ.

މިއަދު ކުރިޔަށްދާ އެމްޑީޕީގެ ޕްރައިމަރީގެ އިންތިޚާބުގައި، ވޯޓާސް ލިސްޓުގައި ނަން ނެތް ގިނަ ބަޔަކު ވޯޓުލަމުން ދާކަމުގެ ޝަކުވާތައް ވަނީ ގިނަވެފަ އެވެ.

މިގޮތުން ހޯޑެއްދޫގައި ވެސް ވަނީ ވޯޓުލުން ހުއްޓުވާފަ އެވެ. އަދި ގދ. ގައްދޫގައި، ވޯޓުލާ ސަރަހައްދަށް ބޮޑީ ކެމެރާ ވައްދައިގެން ވޯޓު ލާން ފެށުމުން، އެރަށުގައި ތިބި ރައީސް މުހައްމަދު ނަޝީދުގެ ސަޕޯޓަރުންތަކެއް ވަނީ ވޯޓު ކަރުދާސްތައް ވީދާލާއި، ވޯޓު ފޮށިތައް ފުނޑާލާފަ އެވެ.

އެމްޑީޕީ ރިޔާސީ ޕްރައިމަރީގެ ވޯޓުލާ މަރުކަޒެއް

މީގެ އިތުރުން ތާޖުއްދީން ސްކޫލުގައި ބަހައްޓާފައި ހުރި ގއ. ވިލިނގިލީގެ ވޯޓު ފޮއްޓަށް ވޯޓާސް ލިސްޓުގައި ނަން ނެތް މީހަކު ވޯޓުލާފައިވާ ކަމުގެ ޝަކުވާއެއްވެސް އެމްޑީޕީގެ އިންތިހާބާ ބެހޭ ކޮމިޓީއަށް ވެސް ވަނީ ހުށަހަޅާފަ އެވެ.

މިއަދު ކުރިޔަށްދާ އެމްޑީޕީގެ ރިޔާސީ ޕްރައިމަރީގައި އެހެން ބައެއް ސަރަހައްދުތަކުގައި ވެސް ވަނީ ހަމަނުޖެހުން ހިނގާ، ވޯޓުލުން ވެސް ފަސްކުރަން ޖެހިފަ އެވެ.

ޕްރައިމަރީގެ އިންތިހާބާއި ގުޅިގެން މި ނޫން ވެސް މައްސަލަތައް ފެންމަތިވަމުން އަންނައިރު، އިންތިހާބު ފެށުމުގެ ކުރިން ވެސް ރައީސް ނަޝީދުގެ ކެމްޕެއިން ޓީމުން ވަނީ ވާދަވެރި ކެންޑިޑޭޓު، ރައީސް އިބްރާހީމް މުހައްމަދު ސޯލިހުގެ ފެކްޝަނުން އިންތިހާބު ގަޑުބަޑުކުރަން އުޅޭ ކަމަށް ތުހުމަތުކޮށްފަ އެވެ.