އެމްޑީޕީގެ ރިޔާސީ ޕްރައިމަރީގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހަށް ކާމިޔާބު ލިބި އެމްޑީޕީގެ ރިޔާސީ ޓިކެޓް ކާމިޔާބު ކޮށްފިކަން މިހާތަނަށް ލިބިފައި ހުރި ނަތީޖާތަކުން ދައްކައިފި އެވެ.

މިހާތަނަށް ގުނި ވޯޓު ފޮށިތަކުގެ ނަތީޖާއިން 65 ޕަސެންޓުން ކުރީގައި އޮތީ ރައީސް ސޯލިހެވެ. އެހެންކަމުން މި އިންތިހާބުގެ މިހާތަނަށް ގުނުނު ވޯޓަށް ބަލާއިރު، ރައީސް މުހައްމަދު ނަޝީދު ދެން މޮޅުވާނެ ކަމަށް ނުބެލެވެ އެވެ.

މި ނަތީޖާއާއެކު ރައީސް ނަޝީދަށް ސަޕޯޓް ކުރާ ފަރާތްތަކުންދަނީ އިންތިހާބު ގަޑުބަޑުކޮށް އޮޅުވާލި ކަމަށް ބުނަމުންނެވެ.

ރައީސް ނަޝީދު ވެސް މި އިންތިހާބުގެ ނަތީޖާ ގަބޫލެއް ނުކުރައްވަ އެވެ.

އެގޮތުން މިއަދުގެ އިންތިހާބުގައި ވޯޓު އޮޅުވާލަން ބަޔަކު މަސައްކަތް ކުރި ކަމަށް ނަޝީދު ވަނީ ތުހުމަތު ކުރައްވައިފަ އެވެ. އަދި އެމަނިކުފާނުގެ ބައެއް މަންދޫބުންނާއި ސަޕޯޓަރުން ނުހައްގުން ހައްޔަރު ކުރި ކަމަށް ވެސް ނަޝީދު ތުހުމަތު ކުރެއްވި އެވެ.

އިންތިހާބުގެ ތެރެއިން ވެސް ގިނަ މައްސަލަތަކެއް ފެންމަތިވެ، ހަމަނުޖެހުންތަކެއް ހިނގި އެވެ. އިލެކްޝަން ކޮމިޓީން ބުނި ގޮތުގައި އިންތިހާބާ ގުޅިގެން ރަސްމީކޮށް ހުށަހަޅާފައިވަނީ 10 މައްސަލައެކެވެ.

"ބައެއް ވޯޓު ފޮށިތައް ކައިރީގައި އަޅުގަނޑުގެ ފަރާތުން ތިބި ކިތަންމެ އޮބްޒާވަރުންނާއި ތާއީދު ކުރާ މީހުން ފުލުހުން ވަނީ ހައްޔަރުކޮށްފަ. އެ މީހުން ވަގުތުން ދޫކޮށްލުމަށް އަދި ވޯޓު ގަޑުބަޑު ކުރާ މީހުންނާމެދު ފިޔަވަޅު އެޅުމަށް ގޮވާލަން،" ނަޝީދު ވިދާޅުވި އެވެ.

އެހެން ނަމަވެސް ދެން ރައީސް ނަޝީދު އަމަލު ކުރައްވާނީ ކިހިނެއް ކަމެއް ހާމަކުރައްވާފަ އެއް ނުވެ އެވެ. ސިޔާސީ މަސްރަހު ދިރާސާ ކުރައްވާ ބައެއް ފަރާތްތަކުން ބުނަނީ ރައީސް ނަޝީދު އެމްޑީޕީއިން ދުރަކަށް ނުދާނެ ކަމަށެވެ. އަދި އިތުރު ޕާޓީއެއް ވެސް ނަހައްދަވާނެ ކަމަށެވެ. އިންތިހާބުގައި ގިނަ އޮޅުވާލުންތަކެއް ހުރިކަން ފާހަގަކުރެވޭ ކަމަށާއި އެހެންކަމުން އެކަން ކަން ރައީސް ނަޝީދު ދުލެއް ނުކުރައްވާނެ ކަމަށެވެ.

"ރައީސް ނަޝީދު ހިއެއްނުވޭ އެމްޑީޕީން ވަކިވާނެ ހެން. އިބޫއަށް އުނދަގޫކުރަން ހުންނާނީ ކަންނޭނގެ. ފެންނަން މިހިރީ އަސްލު މިއަދުގެ ވޯޓުލުން ކުރިއަށް ދިޔައިރު ވަރަށް ނޭދެވޭ ކަންކަން. ނުފޫޒު ފޯރުވި ކަން. ދެން އެމްޑީޕީގެ ގިނަ ބަޔަކު ވޯޓުލާން ނުވެސް ނިކުމޭ. އަދި ގިނަ މީހުން ދަފްތަރުންވެސް އުނިކުރި،" އެމްޑީޕީ ތެރެއިން ނަން ހާމަކުރަން ބޭނުން ނުވާ އިސް މީހަކު "ހުރިހާ" އާ ވާހަކަ ދައްކަމުން މިރޭ ބުންޏެވެ.

"ރައީސް ސޯލިހު އަތުގައި ހުރިހާ ބާރެއް އޮތީމަ އިންތިހާބު ކާމިޔާބު ކުރާނެ ފޯނިއުލާ އެނގޭނެ. އެކަން ދެން އެންމެމަށްވެސް އެނގޭ،" އޭނާ ބުންޏެވެ.

މި ނަތީޖާއާއި ގުޅިގެން ރައީސް ނަޝީދު ގެންގުޅުއްވާ ކަމަށް ތުހުމަތު ކުރެވޭ ޓުވިޓާ އެކައުންޓުން ވެސް ވަނީ ތަފާތު ޓުވީޓުތަކެއް ކުރައްވާފަ އެވެ.

އަދި ރައީސް ނަޝީދަށް ތާއީދުކުރާ ފަރާތްތަކުން ވެސް ދަނީ ސޯޝަލް މީޑިއާގައި ހިތްހަމަނުޖެހުން ފާޅުކުރަމުންނެވެ.

އެމްޑީޕީގެ ރިޔާސީ ޕްރައިމަރީގައި މާލެއާއި އަތޮޅުތަކުގައި 200 އަށްވުރެ ގިނަ ވޯޓު ފޮށި ބަހައްޓާފައިވާއިރު، މި އިންތިޚާބުގައި 50 ހާހަށްވުރެ ގިނަ މީހުންނަށް ވޯޓު ދިނުމުގެ ހައްގު ލިބިފައިވާކަމަށް އެޕާޓީން ނެރުނު ލިސްޓުގައި ވެ އެވެ.