އަމީނީ މަގު ތަރައްގީކުރާއިރު ގަސް ކަނޑަނީ އޭގެ ސަބަބުން މަގަށް ގެއްލުމެއް ލިބިދާނެތީ ކަމަށް ހައުސިން މިނިސްޓަރު މުހައްމަދު އަސްލަމް މިއަދު ވިދާޅުވެއްޖެ އެވެ.

ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ކުރެއްވި ސުވާލަކަށް ޖަވާބުދެއްވަމުން، މިނިސްޓަރު ވިދާޅުވީ އަމީނީ މަގުގައި ހުރި ބޮޑެޔި ބިޔަ ގަސްތައް ކަނޑަނީ ވަކި ސިޔާސަތެއްގެ ދަށުން ނޫން ކަމަށެވެ. އަދި އެ ގަސްތަކަކީ ކިތަންމެ ގިނަ ދުވަސްވީ، އަދި ކިތަންމެ ބިޔަ، ހިޔާދޭ ގަސްތަކެއް ނަމަވެސް އޭގެ ސަބަބުން މަގު އަލުން ޑިޒައިންކޮށް ތަރައްގީކޮށްގެން ބޭނުންކުރާއިރު މަގަށް ގެއްލުންވުމުގެ ފުރުސަތު ބޮޑުވާނެ ކަމަށް އަސްލަމް ވިދާޅުވި އެވެ.

"ގަސްތަކުގެ ފަލަމިން ތިރީސް ސެންޓި މީޓަރަށް ވުރެ ފަލަވާން ފެށީމާ ދުނިޔޭގެ އެހެން ތަންތާގައި ވެސް ފެންނަން ހުރި ލިޓަރޭޗާއިން ފެންނަން ހުރ.، އަދި ރާއްޖޭގައި އެ ކަން އެބަ ތަޖުރިބާ ވެސް ކުރެވޭ މަގުތަކުގައި ހުންނަ ކާނުތަކާއި ޕޭވްމަންޓުތަކާއި އަދި ރޯޑް ސާފަސްއަށް އޭގެ ސަބަބުން ޑެމޭޖުތަކެއް ކުރިމަތިކުރޭ،" މިނިސްޓަރު ވިދާޅުވި އެވެ.

މަގުހެދުމުގެ މަސައްކަތް ކުރަމުންދާއިރު މައްސަލަތައް ފާހަގަކުރެވޭ ގަސްތައް ރީޕްލާންޓް ކުރުމަކީ ސަރުކާރުގެ ވިސްނުން ކަމަށާއި މަގުތައް ހެދިގެން ދާއިރު ގަސް އިންދަށް ހާއްސަކޮށް އެންކޭސް ކޮށްފައި އިންނަ ތަނެއް ކޮންމެ 25 މީޓަރަކުން އިންނާނެ ކަމަށް މިނިސްޓަރު ވިދާޅުވި އެވެ.

"ސަރުކާރުގެ ސިޔާސަތެއްގެ ދަށަކުންނެއް ނޫން ޕްރެކްޓިކަލް ރީޒަންސްއަށް ގަސްތައް ކަނޑަނީ،" އަސްލަމް ވިދާޅުވި އެވެ.

މަގު ތަރައްގީކުރާއިރު އެ މަގުގައި ޑީވޯޓަރިން ހޮޅިއާއި އެމްޑަބްލިއުއެސްސީގެ ފާޚާނާ ނިޒާމު އަޕްގްރޭޑްކުރުމުގެ އިތުރު ހޮޅިތަކާއި ހައި ވޯލްޓޭޖް ކޭބަލްތަކާއި އަދިވެސް އެހެން ޚިދުމަތްތަކަށް ލާފައިހުރި ހޮޅިތައް އަލުން ވަޅުލާނެކަމަށް އަސްލަމް ވިދާޅުވިއެވެ.

އެހެންކަމުން ގަސްތައް ބޮޑުވެ ދުވަސްވާވަރަކަށް ގެއްލުންވުމުގެ ފުރުސަތު ބޮޑުކަމަށް މިނިސްޓަރު ވިދާޅުވި އެވެ.

އަމީނީ މަގުގެ މަސައްކަތް ކުރިއަށް ގެންދިއުމަށް މިދިޔަ ޖުލައި ތިންވަނަ ދުވަހު ސަރުކާރުން އާރްޑީސީއާ ހަވާލުކޮށްފައިވަނީ 84 މިލިއަން ރުފިޔާ އަށެވެ.