ރާއްޖޭގެ އިސްލާމިކް މިނިސްޓްރީގައި ރަޖިސްޓްރީކޮށްފައިވާ ދީނީ އިލްމުވެރިންގެ ތެރޭން ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒަށް 76 ޕަސެންޓް އިލްމުވެރިން ތާއީދުނުކުރާ ކަމަށް ދީނީ އިލްމުވެރިޔާ ޑރ. މުހައްމަދު އިޔާޒް ވިދާޅުވެއްޖެ އެވެ.
އިލްމުވެރިންގެ ގުޅުމުގެ ގިނަ ބަޔަކު ޑރ. މުއިއްޒަށް ތާއީދުކުރާ ކަމަށް ބުނެ ނެގި ވޯޓާ ގުޅިގެން އިޔާޒް ކުރެއްވި ޓްވީޓުގައި ވިދާޅުވީ ރާއްޖޭގައި 363 ދީނީ އިލްމުވެރިން ތިއްބެވިއިރު އޭގެ ތެރޭން 267 އިލްމުވެރިން މުއިއްޒަށް ތާއީދު ނުކުރައްވާ ކަމަށެވެ.
އިލްމުވެރިންގެ ގުޅުމުގެ އެ ވޯޓު ނެގުމުގައި އިސްކޮށް އުޅެފައިވާ ކަމަށް ޚަބަރުތަކުން ބުނެފައި ވަނީ ޑރ. މުއިއްޒަށް ތާއީދުކޮށްފައިވާ ޕީޕީއެމްގެ އެޑްވައިޒަރު ޑރ. މުހައްމަދު ޝަހީމް އަލީ ސައީދާއި ޑރ. މުއިއްޒަށް ތާއީދުކުރާ ސަލަފް ޖަމާއަތުން ކަމަށެވެ.
ގައުމީ ޔުނިވާސީޓީގެ އެސިސްޓެންޓް ޕްރޮފެސަރު އަދި އަދާލަތު ޕާޓީގެ އިލްމުވެރިންގެ މަޖިލީހުގައި ހިމެނިވަޑައިގަންނަވާ ޑރ. އިޔާޒު ވަނީ ރާއްޖޭގައި ދީނީ ދަރުސް ދިނުމުގެ ހުއްދަ އޮންނަ 363 އިލްމުވެރިން ތިބި އިރު އޭގެ ތެރެއިން 87 މީހަކު މުއިއްޒުއަށް ތާއިދު ކުރުމަކީ އިލްމުވެރިންގެ މެޖޯރިޓީތޯ ސުވާލު ކުރައްވައިފަ އެވެ. އަދި އިލްމުވެރިންގެ ތެރޭން 24 ޕަސެންޓް މުއިއްޒަށް ތާއިދުކުރުމުން އިލްމުވެރިންގެ ތެރޭން ގިނަ ބަޔަކު ތާއިދުކުރި ކަމަށް ބުނެ ދޮގު ޚަބަރު ނުފެތުރުމަށް އިޔާޒް ވަނީ އިލްތިމާސް ކުރައްވައިފަ އެވެ.
ސިޔާސީ ވިސްނުން ކުރިއެރުވުމަށް ޢިލްމުވެރިންގެ ނަމުގައި އިތުރުފުޅު ނުހެއްދެވުމަށް ޑރ. އިޔާޒް ވަނީ ޑރ. މުއިއްޒަށް ގޮވާލައްވައިފަ އެވެ.
ރާއްޖޭގެ ގިނަ އަދަދެއްގެ ދީނީ އިލްމުވެރިން މިއަދު ވަނީ ރައީސް އިބްރާހިމް މުހައްމަދު ސޯލިހަށް ތާއީދު އޮތްކަން ހާމަކޮށް ނޫސްވެރިންގެ ބައްދަލުވުމެއް ބާއްވައިފަ އެވެ.
އެ ބައްދަލުވުމުގައި ޑރ. އިޔާޒް ވިދާޅުވީ ރައީސް ސޯލިހުގެ ފަރާތްޕުޅުން ފެނިފައި ވަނީ ކަންކަމާ މަޝްވަރާކޮށްގެން ގޮތް ނިންމެވުމުގެ ރިވެތި ސިފަ ކަމަށެވެ. އަދި ދީނީ ކަންކަމުގައި ދީނީ އިލްމުވެރިންނާ ބައްދަލު ކުރައްވައި މަޝްވަރާ ކުރައްވާފައިވާކަން ޑރ. އިޔާޒް ފާހަގަކުރެއްވި އެވެ. އެ ގޮތުން މޫނު ބުރުގާގެ މައްސަލާގައި އިލްމުވެރިން އެދުނު ގޮތަށް އަކުރުން އަކުރަށް އެކަން ހައްލުކޮށްދެއްވި ކަމަށް ވިދާޅުވި އެވެ. އަދި ރައީސް ވަނީ ސަރުކާރާ ދެކޮޅަށް ފާޅުގައި ފާޑުކިޔާ އިލްމުވެރިންނާ ވެސް ބައްދަލު ކުރައްވާފައި ކަމަށް ޑރ. އިޔާޒް ވިދާޅުވި އެވެ.
ހަސަދަވެރި ތި ވަނީ އެންމެ ދަށު ދަރަޖައިގެ ފެންވަރުގައި އިންޝާ ﷲ ހަސަދަވެރިން ގެ މައްޗަށް މުއިއްޒު ކާމިޔާބް ހޯއްދަވާނެ
ޑރ. އިޔާޒް ތިޔަ ހެއްދެވީ ބޮޑުވެގެންވާ އިތުރުފުޅެއް. އަދި ގަސްތުގައި އެނގިހުރެ އޮޅުވާލުމެއް. ވޯޓުގައި ބައިވެރިވީ ޖުމްލަ 105 ޢިލްމުވެރީން. އޭގެތެރޭއިން 87 ބޭފުޅުން މުޢިޢްޒަށް ތާއީދު ކުރައްވީ. ސޯލިހަަށް ތާއީދު ކުރެއްވީ 5 ބޭފުޅުން. އެގްރޫޕްގައި ތިއްބެވީ ޖުމްލަ 138 ޢިލްމުވެރިން.