ކޮވިޑާ ދެކޮޅަށް ޖޯންސަން އެންޑް ޖޯންސަންއިން އުފައްދާފައިވާ ވެކްސިން އިމަޖެންސީ ބޭނުންކުރުމުގެ ހުއްދައަށް އެދި އެމެރިކާގެ ފުޑް އެންޑް ޑްރަގް އެޖެންސީ (އެފްޑީއޭ)އަށް ހުށަހަޅައިފި އެވެ.

ޖޯންސަން އެންޑް ޖޯންސަންގެ މިވެކްސިން އިމަޖެންސީ ހާލަތުގައި ބޭނުންކުރުމަށް ހުއްދަދީފި ނަމަ ވެގެންދާނީ އެމެރިކާގައި ކޮވިޑާ ދެކޮޅަށް ބޭނުންކުރަން ހުއްދަ ދިން ތިންވަނަ ވެކްސިނަށެވެ.

އެމެރިކާގައި މީހުންގެ ގަޔަށް ޖެހުމަށް މިހާތަނަށް ހުއްދަދީފައިވަނީ ފައިޒާ-ބަޔޯއެންޓެކް އަދި މޮޑާނާގެ ވެކްސިންއަށެވެ.

"އިމަޖެންސީ ހާލަތުގައި ބޭނުންކުރުމަށް މިއަދު މިހުށަހެޅި އެއްފަހަރު ޖަހާ އިންވެސްޓިގޭޝަނަލް ކޮވިޑް19 ވެކްސިންއަކީ ދުނިޔެއަށް ކުރިމަތިވެފައިވާ ބަލިމަޑުކަމުން އަރައިގަނެ، ޕެންޑެމިކްއަށް ނިމުމެއް ގެނައުމަށް ވަރަށް މުހިންމު ފައްތަރެއް،" ޖޯންސަން އެންޑް ޖޯންސަންގެ ޗީފް ސައިންޓިސްޓް އޮފިސަރު ޑރ. ޕައުލް ސްޓޮފެލްސް ވިދާޅުވި އެވެ.

އެ ކުންފުނިން ނެރުނު ނޫސްބަޔާނުގައި ވާގޮތުން އެފްޑީއޭގެ ހުއްދަ ލިބުނުހާ އަވަހަށް އެމެރިކާއަށް ވެކްސިން ސަޕްލައިކުރަން ފަށައި، މިއަހަރުގެ ފުރަތަމަ ހަ މަސްދުވަހުގެ ތެރޭގައި 100 މިލިއަން ޑޯޒް ފޯރުކޮށްދިނުމަށްވަނީ ހަމަޖެހިފަ އެވެ.

އެމެރިކާގައި މިހާތަނަށް ކޮވިޑް ޖެހުނު މީހުންގެ އަދަދު 26.7 މިލިއަނަށް އަރާފައިވާއިރު އޭގެތެރެއިން 456،000 އަށްވުރެ ގިނަ މީހުން ވަނީ މަރުވެފަ އެވެ. މިއީ، ދުނިޔެއިން މިހާތަނަށް ކޮވިޑް ޖެހިގެން އެންމެ ގިނަ މީހުން މަރުވި ގައުމެވެ.