އަންނަ އަހަރު އޮންނަ 20 ވަނަ މަޖިލިހުގައި އިންތިހާބުގައި ވާދަނުކުރެއްވުމަށް ތުޅާދޫ ދާއިރާގެ އެމްޑީޕީގެ މެމްބަރު ހިސާން ހުސެއިން ނިންމަވައިފި އެވެ.

ހިސާން "އެކްސް" ގައި ކުރެއްވި ޕޯސްޓެއްގައި ވިދާޅުވީ ތުޅާދޫ ދާއިރާ ތަމްސީލް ކުރައްވަން ދާއިރާގެ ރައްޔިތުން އޭނާ އަށް ދެއްވި ފުރުސަތަށް ދާއިރާގެ ހުރިހާ އެންމެންނަށް ހިތުގެ ފުންމިނުން ޝުކުރު އަދާ ކުރައްވާ ކަމަށެވެ.

"އަޅުގަނޑުގެ މަސައްކަތުގެ އެހީތެރިވެދެއްވި އަޅުގަނޑު އާއިލާއާއި، ޓީމް މެންބަރުންނާއި އެންމެހައި ބޭފުޅުންނަށް އިހްލާސްތެރި ޝުކުރެއް އަދާކުރަން." ހިސާން ވިދާޅުވި އެވެ.

ޖުޑިޝަން ސާވިސް ކޮމިޝަން (ޖޭއެސްސީ) ގެ ރައީސްގެ މަގާމުގައި ހުންނެވި ހިސާން ވިދާޅުވީ ވިދާޅުވީ ކުރިއަށް އޮތް ތަނުގައި ވެސް އެމްޑީޕީއާ އެކުގައި ހުންނަވާނެ ކަމަށެވެ.

" 2024 ވަނަ އަހަރުގެ ރައްޔިތުންގެ މަޖިލީހަށް އަޅުގަނޑު ކުރިމަތި ނުލާން ނިންމާފައިވާކަމުގައި ދަންނަވަން. އުންމީދަކީ މާތް اللهގެ ވާގިފުޅާއެކު އަބަދުވެސް ރައްޔިޔުންނަށް ހިދުމަތްކުރުމުގައި ދެމިހުރުން." ހިސާން ވިދާޅުވި އެވެ.

ހިސާން ވަނީ ކުރީގެ ރައީސް މުހައްމަދު ނަޝީދުގެ ވަކީލުންގެ ޓީމް ހެޑް ކުރައްވާ ވަކީލެއްގެ ގޮތުގައި އުޅުއްވައިފަ އެވެ. އަދި އޭނާ ވަނީ ރައީސް ނަޝީދުގެ ސަރުކާރުގައި ރައީސް އޮފީހުގެ ލީގަލް އެފެއާޒް ޑިޕާޓްމަންޓްވެސް ހެޑް ކުރައްވައިފަ އެވެ. ގާނޫނީ ވަކީލެއްގެ ގޮތުގައި ހުންނަވައިގެން ސިޔާސީ ބައެއް ބޭފުޅުންގެ ދިފާއުގައި އޭނާ މީގެކުރިން ވަކާލާތު ވެސް ކުރެއްވެވި އެވެ.