ޕީޕީއެމް، ޕީއެންސީ ކޮވިޑް ވެކްސިން ޖެހުމާ ދެކޮޅު ނޫން ކަމަށް ޕީއެންސީގެ ރައީސް އަބްދުއްރަހީމް އަބްދުﷲ (އަދުރޭ) ވިދާޅުވެއްޖެ އެވެ.

އަދުރޭ މިރޭ ކުރެއްވި ޓްވީޓެއްގައި ވިދާޅުވީ ޕްރޮގްރެސިވް ކޮންގްރެސް ކޯލިޝަނުން އެދެނީ ވެކްސިންގެ ރައްކާތެރިކަން ކަށަވަރުކޮށް ދިނުމަށް ކަމަށެވެ. އަދި އެ ކޯލިޝަން އަބަދުވެސް އޮންނާނީ ރައްޔިތުންނާ އެކު ކަމަށް އޭނާ ވިދާޅުވި އެވެ.

އަދުރޭ ކޮވިޑް ވެކްސިން ޖެއްސެވި ކަމަށް ދެކެވޭ ވާހަކަތައް އޭނާ ވަނީ ދޮގު ކުރައްވާފަ އެވެ.

ޕީއެންސީގެ ނައިބު ރައީސް އިބްރާހިމް ޝުޖާއު ވެސް ވިދާޅުވެފައި ވަނީ އެ ކޯލިޝަނުން އެދެނީ ރައްކާތެރި ވެކްސިނެއް ދިވެހި ރައްޔިތުންގެ ގަޔަށް ޖަހަން ކަމަށެވެ. އަދި މީގެކުރިން ދަރުބާރުގެއަށް ދާން އެބޭފުޅުން އުޅުނީ ވެކްސިނާ ގުޅޭ މައުލޫމާތު އޮޅުންފިލުވުމަށް އެޗްޕީއޭގެ އިސް ބޭފުޅުންނާ ބައްދަލު ކުރުމަށް ކަމަށް އޭނާ ވިދާޅުވި އެވެ.

ރާއްޖެއަށް އެންމެ ފުރަތަމަ ވެކްސިން ހަދިޔާކުރީ އަވަށްޓެރި އިންޑިއާ އިންނެވެ. އެއީ އެ ގައުމުގެ ސީރަމް އިންސްޓިޓިއުޓުން ތައްޔާރުކުރި ކޮވިޝިލްޑް ވެކްސިންގެ 100،000 ޑޯޒެވެ. ޗައިނާ އިން ވެސް ވަނީ އެ ގައުމުން ތައްޔާރުކުރި ސައިނޯފާމް ވެކްސިންގެ 100،000 ޑޯޒް ރާއްޖެއަށް ހަދިޔާ ކުރުމަށް ނިންމާފަ އެވެ.