ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލްގެ މައްޗަށް ކުރި މަނީ ލޯންޑަރިން އާއި ހިޔާނާތުގެ ދައުވާގެ ޝަރީއަތް ނިމެންފެން އޭނާގެ ޕާސްޕޯޓް ހިފަހައްޓަން ކްރިމިނަލް ކޯޓުން އަމުރުކޮށްފި އެވެ.

ބައްސާމްގެ ޕާސްޕޯޓް ކުރިން އޮތީ ހަ މަސް ދުވަހަށް ހިފަހައްޓައިފަ އެވެ. އެ މުއްދަތު ޖޫން މަހުގެ ފުރަތަމަ ހަފްތާތެރޭގައި ހަމަވާނެ އެވެ.

ބައްސާމްގެ މައްޗަށް ޕްރޮސެކިއުޓާ ޖެނެރަލްގެ އޮފީހުން އުފުލާފައިވާ މަނީ ލޯންޑަރިން އާއި ހިޔާނާތްތެރިވުމުގެ ދައުވާގެ އަޑުއެހުމެއް މިއަދު މެންދުރު ކްރިމިނަލް ކޯޓުގައި ބާއްވާފައިވާއިރު، އެ އަޑުއެހުމުގައި ދައުލަތުގެ ވަކީލުން ވަނީ ބައްސާމްގެ ޕާސްޕޯޓު ޝަރީއަތް ނިމެންދެން ހިފަހައްޓަން އެދިފަ އެވެ.

ދައުލަތުން އެދުނު ގޮތަށް މައްސަލަ ނިމެންދެން، ބައްސާމްގެ ޕާސްޕޯޓް ހިފެއްޓުމަށް ކޯޓުން ވަނީ ނިންމައިފަ އެވެ.

ބައްސާމްގެ ޕާސްޕޯޓު ހިފަހައްޓާފައި ވަނިކޮށް އޭނާ ވަނީ ތައިލެންޑުގައި ބޭއްވި ފީފާގެ ކޮންގްރެސްގައި ބައިވެރިވުމަށް ވެސް ނަން ހުށަހަޅައިފަ އެވެ. އެކަމަކު ޕާސްޕޯޓް ހިފަހައްޓާފައިވުމުން އޭނާ އަށް ދަތުރުނުކުރެވޭތީ، ކޮންގްރެސްގައި ބައިވެރިނުވެވި ބައްސާމް ހުންނަވަން ޖެހުނީ ރާއްޖޭގަ އެވެ.

ޕީޖީ އޮފީހުން ބުނީ ބައްސާމް އެފްއޭއެމްގެ ރައީސްކަމުގެ މަގާމުގައި ހުރެ، ބޭންކް އޮފް ސިލޯންގައި އޮތް އެފްއޭއެމްގެ އެކައުންޓަކަށް، 2018 ވަނަ އަހަރު ޖުލައި އާއި އޯގަސްޓާ ދެމެދު ފީފާއިން ޖަމާކޮށްފައިވާ ފައިސާގެ ތެރެއިން 10،000 ޑޮލަރު ބޭންކަށް ލިޔުންތަކެއް ހުށަހަޅައިގެން ބައްސާމްގެ ބީއެމްއެލް އެކައުންޓަކަށް އޯގަސްޓް 26، 2018 ގައި ޖަމާކޮށްފައިވާ ކަމަށެވެ. މި ފައިސާ ޖަމާކުރީ ބޭންކް ޗާޖުތައް އުނިކުރުމަށް ފަހު ކަމަށް ވާތީ ބައްސާމްގެ އެކައުންޓަށް ޖަމާވީ 9،999 ޑޮލަރެވެ.

މި ފައިސާގެ ތެރެއިން 1،910 ޑޮލަރު އެހެން މީހެއްގެ އެކައުންޓަށް ޖަމާކުރުމަށް ފަހު، ބައްސާމް އާއި އޭނާގެ އަނބިކަނބަލުން އައިމިނަތު މައުރީންގެ ހިއްސާ އޮންނަ ގްލޭސިއާ އިންވެސްޓްމަންޓްގެ އެކައުންޓަށް ޖަމާކޮށް އެ ކުންފުނީގެ އެކި ކަންކަމަށް ބޭނުންކޮށްފައިވާ ކަމަށް ޕީޖީ އޮފީހުން ބުންޏެވެ. އަދި އޭނާގެ އެކައުންޓަށް ޖަމާކުރި ފައިސާގެ ތެރެއިން 2000 ޑޮލަރު އޭނާ ކުއްޔަށް ނަގައިގެން އުޅުނު ރެހެންދި ފްލެޓަށް ކުލި ދެއްކުމަށް ބޭނުންކޮށްފައިވާ ކަމަށާއި އެފްއޭއެމް އެކައުންޓުން ޖަމާކުރި ފައިސާ އެކި މީހުންނަށް އެކި އަދަދުތަކުން ޖަމާކޮށް، އެފްއޭއެމްއާ ގުޅުން ނެތް ކަންކަމާއި އަމިއްލަ ކަންކަމުގައި ވެސް ބޭނުންކޮށްފައިވާ ކަމަށް ޕީޖީ އޮފީހުން ބުނެ އެވެ. ބައްސާމްގެ މައްޗަށް އުފުލާފައިވާ ދައުވާތަކުގެ ތެރެއިން ޚިޔާނާތުގެ ކުށް އޭނާގެ މައްޗަށް ސާބިތުވެއްޖެނަމަ އެއް އަހަރާއި ހަތް މަހާއި ހަ ދުވަހުގެ ޖަލު ހުކުމެއް އަންނާނެ އެވެ. އަދި މަނީ ލޯންޑަރިންގެ ކުށުގެ ދައުވާ ސާބިތުވެއްޖެނަމަ 100،000 ރުފިޔާ އާއި 1،000،000 ރުފިޔާއާ ދެމެދުގެ އަދަދަކުން ޖޫރިމާކުރުމާއެކު ފަސް އަހަރާއި 15 އަހަރާ ދެމެދުގެ މުއްދަތުގެ ޖަލު ހުކުމެއް އަންނާނެ އެވެ.