ޗިލްޑްރަންސް އޮމްބަޑްސްޕާސަންގެ މުސާރަ ކުޑަވެގެން މުސާރަ ބޮޑުކޮށްދިނުމަށް އެދި ރައްޔިތުންގެ މަޖިލީހަށް ހުށަހަޅައިފި އެވެ.

ކުޑަކުދިންގެ ހައްގުތައް ރައްކާތެރި ކުރުމުގެ ގާނޫނުގެ ދަށުން 2020 ވަނަ އަހަރު އުފެއްދި ޗިލްޑްރެންސް އޮމްބަޑްސްޕާސަންގެ މަގާމުގެ މަސްއޫލިއްޔަތު އަދާކުރުމަށް އޮފީހެއް ވަނީ ގާއިމްކޮށްފަ އެވެ. ނަމަވެސް އެ އޮފީހަށް ދައުލަތުން ކުރާ ހަރަދާއި ނެރެވޭ ނަތީޖާއާ ބައްދަލުތޯ ގިނަ ބަޔަކު އަންނަނީ ސުވާލު އުފައްދަމުންނެވެ.

ރައްޔިތުންގެ މަޖިލީހުގެ މާލިއްޔަތު ކޮމިޓީގެ މިއަދުގެ ބައްދަލުވުމުގައި އެ ކޮމިޓީގެ މުގައްރިރު ގާސިމް އިބްރާހިމް ވަނީ މުސާރަ ބޮޑުކޮށްދިނުމަށް އެދި އެ އޮފީހުން ފޮނުވާފައިވާ ސިޓީއެއް އިއްވާފަ އެވެ.

ކޮމިޓީގެ ސެކްރެޓޭރިއޭޓުން ބުނީ މިދިޔަ އަހަރު މިނިވަން މުއައްސަސާތަކުގެ މުސާރަ ބޮޑުކުރިއިރު، ޗިލްޑްރަންސް އޮމްބަޑްސް ޕާސަންގެ މުސާރަ ވެސް ބޮޑުކުރި ކަމަށެވެ.

އެންމެ ފުރަތަމަ ޗިލްޑްރަންސް އޮމްބަޑްސްޕާސަންގެ މުސާރަ ކަމަށް ކަނޑައަޅާފައިވަނީ 35،000ރ. އެވެ. މަޖިލީހުގެ މާލިއްޔަތު ކޮމިޓީން މިދިޔަ އަހަރު ވަނީ އެ މަގާމުގެ މުސާރަ 41،000ރ. އަށް ބޮޑުކޮށްފަ އެވެ. އެކަމަކު، މިއީ އެހެން މިނިވަން މުއައްސަސާތަކުގެ މެންބަރުންގެ މުސާރައަށް ވުރެ ކުޑަ އަދަދަކަށްވާތީ އޮމްބަޑްސްޕާސަންގެ އޮފީހުން ކަންބޮޑުވެ އެވެ.

އެ މައްސަލާގައި ނޭޝަނަލް ޕޭ ކޮމިޝަނާ ބައްދަލުކުރަން ކޮމިޓީން މިއަދު ވަނީ ފާސްކޮށްފަ އެވެ.