ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ މުރާދޫގެއަށް ބަދަލުވެވަޑައިގެންފި އެވެ.

ރައްޔިތުންގެ މަޖިލީހުގެ އިދާރާއިން ވަނީ އެކަން ކަށަވަރުކޮށްދީފަ އެވެ. އެ އިދާރާ އިން ބުނީ އަބްދުއްރަހީމް މުރައިދޫގެއަށް ބަދަލުވެވަޑައިގަތީ އިއްޔެ ކަމަށެވެ.

އޭނާ އެގެއަށް ބަދަލުވެވަޑައިގަތުމަށްޓަކައި އެ ގެ ވަނީ ވަރަށް ބޮޑަށް މަރާމާތުކޮށްފަ އެވެ.

މަޖިލީހުގެ ރައީސް މުރައިދޫގެއަށް ބަދަލުވެވަޑައިގަތްއިރު، އޭނާ އާއި އަނބިކަނބަލުން ރެހެންދި ފްލެޓުން ބައްލަވައިގެންފައިވާ ދެ ފްލެޓް އެބަހުއްޓެވެ. އެއިން ފްލެޓެއް ބައްލައިގަތީ 4.5 މިލިއަން ރުފިޔާ އަށެވެ.

ދިވެހި ރައްޔިތުން ގަރުދިޔަ އާއި ބަތް ކައިގެން އާދައިގެ ދިރިއުޅުމަކަށް ތިރިވާންޖެހޭ ކަމަށް ރައީސް އޮފީހުގެ މިނިސްޓަރު އަލީ އާރިފް ވިދާޅުވެފައިވާ ދަނޑިވަޅެއްގައި ސަރުކާރުގެ ހަރަދުގައި އަބްދުއްރަހީމް ދިރިއުޅުއްވަން ފެއްޓެވުމުން ގިނަ ބަޔަކު އަންނީ ފާޑުކިޔަމުންނެވެ.

އެންމެފަހުން މުރައިދޫގޭގައި ދިރިއުޅުއްވީ ކުރީގެ ރައީސް އަދި މަޖިލީހުގެ ކުރީގެ ރައީސް މުހައްމަދު ނަޝީދެވެ. އެމަނިކުފާނު އެގެއަށް ބަދަލުވެވަޑައިގަތީ އެމަނިކުފާނަށް ދިން ބޮމުގެ ހަމަލާއަށްފަހު އެވެ.