ހުޅުމާލޭގައި ހުންނަ "މެލްޓްޒް" ރެސްޓޯރަންޓުގައި އަލިފާނުގެ ހާދިސާއެއް ހިނގައިފި އެވެ.

އެމްއެންޑީއެފުން ބުނީ ރެސްޓޯރަންޓްގައި ރޯވި އަލިފާން، އެމްއެންޑީއެފް މާލެ އޭރިއާ ކޮމާންޑް، ހުޅުމާލެ ފަޔާ ސްޓޭޝަނުން ނިއްވާލާފައިވާ ކަމަށެވެ.

މި ހާދިސާގެ ރިޕޯޓް މިއަދު ހެނދުނު 10:26 ހާއިރު މާލެ ފަޔާ ސްޓޭޝަނަށް ލިބުމާއެކު، އެމްއެންޑީއެފް މާލެ އޭރިއާ ކޮމާންޑް، ހުޅުމާލެ ފަޔަރ ސްޓޭޝަންގެ ފަޔާ ފައިޓަރުން ވަނީ އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ކޮށްފަ އެވެ. މިގޮތުން، ހުޅުމާލެ ފަޔާ ސްޓޭޝަންގެ ފަޔާ ފައިޓަރުން ކުރި މަސައްކަތުން އެ ރެސްޓޯރަންޓު ބަދިގޭގައި ރޯވި އަލިފާން އެއްކޮށް ނިއްވާލެވުނީ މިއަދު 11:02 ހާއިރުކަމަށް އެމްއެންޑީއެފުން ބުނެ އެވެ.

މި ހާދިސާގައި ރެސްޓޯރަންޓުގެ ބަދިގޭގައި ގެންގުޅޭ ގިނަ އަދަދެއްގެ ސާމާނުތަކަށް ވަނީ ގެއްލުންވެފަ އެވެ. އެއްވެސް މީހަކަށް މި ހާދިސާގައި އަނިޔާއެއް ލިބިފައި ނުވާކަމަށް އެމްއެންޑީއެފުން ބުނެ އެވެ.