ފްލޮރިޑާއަށް ކުރިމަތިވަމުން އަންނަ ތޫފާންތަކުގައި ހާލުގައި ޖެހުނު ފަރާތްތަކަށް އެހީވުމަށްޓަކައި މަޝްހޫރު ލަވަކިޔުންތެރިޔާ ޓޭލާ ސްވިފްޓް ފަސް މިލިއަން ޑޮލަރު ހަދިޔާކޮށްފި އެވެ.

މިދިޔަ ހަފްތާގެ ތެރޭގައި ފްލޮރިޑާއަށް އެރި ހަރިކޭން ހެލެންގައި އެތައް ބައެއްގެ ގެދޮރު ގެއްލި ހާލުގައި ޖެހިފައިވާއިރު މިހަފްތާގެ ތެރޭގައި އިތުރު ތޫފާނެއް ހަމަ އެ ސަރަހައްދަށް އަރާނެ ކަމަށް ބެލެވެ އެވެ.

މި ތޫފާނުގައި ހާލުގައި ޖެހުނު ފަރާތްތަކަށް އެހީވުމުގައި ހިލޭ ސާބަހަށް މަސައްކަތްކުރާ ޖަމިއްޔާއެއް ކަމަށްވާ "ފީޑިން އެމެރިކާ"އިން ނެރުނު ބަޔާނެއްގައި ބުނެފައިވަނީ އެ ޖަމާއަތުގެ ފަންޑަށް ޓޭލާގެ ފަރާތުން ލިބުނު ދީލަތި އެހީއަށް ޝުކުރު އަދާކުރާ ކަމަށެވެ.

"މި އެހީއިން އެތައް ބައަކަށް ކާބޯތަކެތި ފޯރުކޮށްދެވި ގެދޮރު އިމާރާތްކޮށް ދިރިއުޅުން އަލުން ބިނާ ކުރެވޭނެ" އެ ޖަމިއްޔާގެ ބަޔާނުގައިވެ އެވެ.

ޓޭލާގެ ފަރާތުން މި އެހީ ދިންކަން ޔަގީން ކޮށްދީފައި ނުވި ނަމަވެސް އޭނާއަކީ އެފަދަ ކަންކަމަށް އާއްމުކޮށް އެހީތެރިވާ ފަންނާނެކެވެ.

ފްލޮރިޑާއަކީ އާއްމުކޮށް ވެސް ގުދުރަތީ ހާދިސާތައް ގިނައިން ކުރިމަތިވާ ސަރަހައްދަކަށްވާއިރު މިފަހަކަށް އައިސް އެފަދަ ހާދިސާތައް އިތުރުވަމުން އަންނަކަން ފާހަގަކޮށްލެވެ އެވެ.