ގއ. ކޫއްޑު އެއާޕޯޓުގެ ރަންވޭގެ ފެންވަރު ދަށްވެގެން އެ އެއާޕޯޓަށް ދަތުރު ނުކުރުމަށް ގައުމީ، އެއާލައިން މޯލްޑިވިއަންއިން ނިންމައިފި އެވެ.

ކޫއްޑޫ އެއާޕޯޓްގެ ބައެއް މުވައްޒަފުން ވަނީ "ހުރިހާ"އަށް އެކަން ކަށަވަރުކޮށްދީފަ އެވެ. ކޫއްޑުއަށް ދަތުރުކުރަނީ ހަމައެކަނި މޯލްޑިވިއަނުންނެވެ. އެ އެއާޕޯޓަށް ބައެއް ފަހަރު ޕްރައިވެޓް ޖެޓްތައް ޖައްސަ އެވެ.

އެ އެއާޕޯޓް ހިންގަނީ ރާއްޖެއިން ބޭރުގެ ކުންފުންޏަކުންނެވެ. އެއާޕޯޓުގެ ތަރައްގީއަށް އެއްވެސް މަސައްކަތެއް މިހާތަނަށް ކޮށްފައިނުވާ ކަމަށް "ހުރިހާ"އާ ވާހަކަދެއްކި މުވައްޒަފުން ކިޔައިދިނެވެ.

"އެންމެފަހުން މޯލްޑިވިއަނުން ޝެޑިއުލްކޮށްފައި ވަނީ މާދަމާ މި އެއާޕޯޓަށް ދަތުރެއް ކުރާގޮތަށް. އެކަމަކު ދަތުރުކުރުން މެދުކަނޑާލިކަން މިހާރު ވަނީ ރަސްމީކޮށް އެއާޕޯޓް ހިންގާ ކުންފުންޏަށް އަންގާފައި،" އެއާޕޯޓްގެ މުވައްޒަފަކު ކިޔައިދިނެވެ.

އެ އެއާޕޯޓް ހިންގާ ކުންފުނިން މުވައްޒަފުންގެ މުސާރައަށް ވެސް އެއްވެސް ހެޔޮބަދަލެއް ފާއިތުވި ތަނުގައި ގެނެސްފައިނުވުމަކީ މުވައްޒަފުންގެ ވަރަށް ބޮޑު ކަންބޮޑުވުމެކެވެ.

"މުވައްޒަފުންގެ މުސާރަ ބޮޑުކޮށެއް ނުދޭ. އަޅުގަނޑުމެން އެތައް ފަހަރަކު އާދޭސް ކުރިން. އެކަމަކު އެކަމެއް ކޮށެއް ނުދިން. މި އެއާޕޯޓްގެ ރަންވޭ މަރާމާތު ނުކުރާތާ މިހާރު ހަތް އަހަރު މިވަނީ ވެފައި. މިކަން ބަލާނެ އެއްވެސް މުއައްސަސާއެއް އެއްވެސް ސަރުކާރެއްގައި ނެތް،" އެ އެއާޕޯޓްގެ މުވައްޒަފަކު ކިޔައިދިނެވެ.

މިކަމާ ގުޅިގެން މޯލްޑިވިއަންގެ ބަހެއް އަދި ނުލިބެ އެވެ.

މޯލްޑިވިއަނުން މިއަދު ވަނީ ށ. ފުނަދޫ އެއާޕޯޓަށް ކުރާ ދަތުރުތައް ވެސް މެދުކަނޑާލާފަ އެވެ. އެ އެއާލައިން ހިންގާ އައިލެންޑްއޭވިއޭޝަން ސާވިސް އިން ބުނީ ފުނަދުއަށް ކުރާ ދަތުރުތައް މެދުކަނޑާލީ ޓެކްނިކަލް މައްސަލައަކާ ގުޅިގެން ކަމަށެވެ.