އިގްތިސޯދީ ރިފޯމް އެޖެންޑާގެ ދަށުން ސިޔާސީ މަގާމުގައި ތިއްބެވި 228 ބޭފުޅަކު ވަކިކުރައްވަން ރައީސް މުއިއްޒު ނިންމަވައިފި އެވެ.

ރައީސް ދެންމެ ވަނީ ކުރިއަށް އޮތް 15 ދުވަސް ތެރޭގައި ސިޔާސީ މަގާމުތަށް މަދުކުރައްވާނެކަމަށް އިއުލާން ކުރައްވާފަ އެވެ.

އެގޮތުން 7 ސްޓޭޓް މިނިސްޓަރުންނާއި، 43 ޑެޕިއުޓީ މިނިސްޓަރުން، 109 ސީނިއާ ޕޮލިޓިކަލް ޑައިރެކްޓަރުންގެ އިތުރުން 69 ޕޮލިޓިކަލް ޑައިރެކްޓަރުން ވަޒީފާއިން ވަކިކުރެއްވުމަށް ރައީސް ވަނީ ނިންމަވާފަ އެވެ.

ރައީސް ވިދާޅުވީ މިކަމުގެ ސަބަބުން ދައުލަތު ބަޖެޓުން 5.714 މިލިއަން ރުފިޔާ ސަލާމަތް ކުރެވޭނެ ކަމަށެވެ.

ރައީސް ސިޔާސީ މަގާމު މަދުކުރައްވަން ނިންމަވާފައިވާއިރު، ސިޔާސީ މަގާމުތަކުގެ އަދަދު ސަރުކާރުން ވަނީ ސިއްރުކޮށްފަ އެވެ. އިދިކޮޅު އެމްޑީޕީން ތުހުމަތު ކުރާގޮތުގައި ސިޔާސީ މަގާމުތަކުގެ އަދަދު 2000 އަށްވުރެ ގިނަ އެވެ.

ރާއްޖޭގެ އިގްތިސޯދީ އަދި މާލީ ހާލަތު ދައްވުމުގެ ސަބަބުން ހަރަދު ކުޑަކުރުމަށް އަވަސް ފިޔަވަޅުތަކެއް އަޅަންޖެހޭކަމަށް މިދިޔަ ހަފްތާގައި ވޯލްޑް ބޭންކުން އާއްމުކުރި ރިޕޯޓެއްގައި ވަނީ ބުނެފަ އެވެ.