ބޮލީވުޑް ދޫކޮށް ހޮލީވުޑްގައި މިހާރު މަސައްކަތް ކުރަމުން އަންނަ މަޝްހޫރު އެކްޓްރެސް ޕްރިޔަންކާ ޗޯޕްރާ އެ ދެ ދާއިރާގައި ހުރި ތަފާތުތައް ކިޔައިދީފި އެވެ.

އެމެރިކާއަށް ދިރިއުޅުން ބަދަލުކޮށް މައިގަނޑު ގޮތެއްގައި ހޮލީވުޑްގެ މަސައްކަތްތައް ކުރަމުން އަންނަ ޕްރިޔަންކާ ވަނީ ދާދި ފަހުން އޭނާގެ އާ ބްރޭންޑް "މެކްސް ފެކްޓާ" ޕްރޮމޯޓް ކުރުމަށްޓަކައި އިންޑިއާގެ މުމްބާއީއަށް ގޮސްފަ އެވެ.

މި ދަތުރުގެ ތެރެއިން ފޯބްސް އިންޑިއާއަށް ދިން އިންޓަވިއުއެއްގައި ޕްރިޔަންކާ ބުނީ ހޮލީވުޑްއާއި ބޮލީވުޑްގައި ވަރަށް ބޮޑު ތަފާތެއް ފާހަގަވާ ކަމަށެވެ.

އެގޮތުން ދެ ދާއިރާގެ ދެމެދުގައި އޭނާއަށް ފާހަގަވި އެންމެ ބޮޑު ތަފާތަކީ ބޮލީވުޑްއާ ހިލާފަށް ހޮލީވުޑްގައި ލިޔެކިޔުންތައް ގެންގުޅުމާއި ރޭވުންތެރިކަން ބޮޑުކަން ކަމަށް ޕްރިޔަންކާ ބުންޏެވެ.

"އަހަރުމެންނަކީ ކަންކަމުގައި ވަރަށް ފަސޭހަކޮށްލާ ބައެއް. އެކަމަކު ހޮލީވުޑްގައި ކޮންމެ ކަމެއް ވެސް އޮންނަނީ ވަރަށް ބޮޑަށް ރޭވިފައި" ޕްރިޔަންކާ ބުންޏެވެ.

އެކަން ފިޔަވައި ދެ ދާއިރާގައި ވެސް ކުރަނީ ގާތްގަނޑަކަށް އެއް މަސައްކަތެއް ކަމަށާއި އެހެން ކަމުން އުޅެން ޖެހޭ ގޮތްވެސް ދާދި އެއްގޮތް ކަމަށް އޭނާ ބުނެފައިވެ އެވެ.

އެ އިންޓަވިއުގައި ޕްރިޔަންކާ އިތުރަށް ބުނީ ބޮލީވުޑްގެ ލަވަތަކާއި ލޯބީގެ ފިލްމުތައް މަތިން ވަރަށް ބޮޑަށް ހަނދާންވާ ކަމަށެވެ. ޕްރިޔަންކާ ވަނީ މިއަހަރުގެ ކުރީކޮޅު އާނަންތު އަމްބާނީގެ ކައިވެނީގައި ބޮލީވުޑް ލަވަތަކަށް ނެށުމުގެ ހުށައެޅުމެއް ހުށައަޅައިދީފަ އެވެ.

ޕްރިޔަންކާގެ ފިލްމީ މަސައްކަތްތަކަށް ބަލާއިރު އޭނާ މިހާރު ކުރަމުން އަންނަނީ "ސިޓަޑޭލް"ގެ ސީޒަން 2ގެ މަސައްކަތެވެ. އޭގެ އިތުރުން "ހެޑް އޮފް ސްޓޭޓް" އާއި "ދަ ބްލަފް"ގައި ވެސް ޕްރިޔަންކާ ފެނިގެންދާނެ އެވެ.