ޑިންގީއެއްގައި ފަރުމަސްވެރިކަމަށް ނުކުމެ އުޅެނިކޮށް ޑިންގީ ބަންޑުން ޖަހާލުމުން އޭގެން ދަތުރު ކުރި ތިން މީހަކު އެމްއެންޑީއެފުން ސަލާމަތްކޮށްފި އެވެ.

އެމްއެންޑީއެފްއިން ބުނީ ތިން ދިވެހިންނާއެކު ފަރުމަސްވެރިކަން ކުރަމުންދިޔަ ޑިންގީއެއް ގެއްލިގެން އުޅޭކަމުގެ މައުލޫމާތު އެމްއެންޑީއެފް ކޯސްޓްގާޑް މެރިޓައިމް ރެސްކިޔު ކޯޑިނޭޝަން ސެންޓަރ (އެމްއާރުސީސީ) އަށް ލިބިފައިވަނީ މިއަދު ހެނދުނު 06:11 ހާއިރު ކަމަށެވެ.

ހާދިސާގެ މައުލޫމާތު ކޯސްޓްގާޑަށް ލިބުމާއެކު، ޑިންގީ ހޯދުމުގެ މަސައްކަތް ވަގުތުން ފެށި ކަމަށާއި މިގޮތުން އެމްއެންޑީއެފް މާލެ އޭރިއާ ކޮމާންޑް، ކޯސްޓްގާޑު ސެކަންޑް ސްކޮޑްރަންގެ ފާސްޓް އިންޓަރސެޕްޓަރ ކްރާފްޓް “ހަކުރާ” އިން ކުރި މަސައްކަތުން ޑިންގީ ފެނިފައިވަނީ މާހަލާ ދިމާ، ދެކުނުން މަގުބެއްދިއާ ދިމާލުން މިއަދު ހެނދުނު 09:32 ހާއިރު ކަމަށް އެމްއެންޑީއެފުން ބުންޏެވެ.

މި ޑިންގީން ދަތުރުކުރި އެންމެންގެ ހާލު ވެސް ރަނގަޅު ކަމަށް އެމްއެންޑީއެފުން ބުންޏެވެ.