ރައީސް އިބްރާހިމް މުހައްމަދު ސޯލިހުގެ ސަރުކާރުން ހިންގި ބިންވެރިޔާ ސްކީމްގެ ދަށުން ކ. ގުޅިފަޅުން ގޯތި ލިބުނު މީހުންގެ މެދުގައި އަލުން ގުރުއަތު ނަގަން ނިންމައިފި އެވެ.

އަލުން ގުރުއަތު ނަގަން ނިންމީ މި ސަރުކާރުން ގުޅިފަޅުގެ ލޭންޑް ޔޫސް ޕްލޭނަށް ބަދަލު ގެނެއުމާއި ގުޅިގެންނެވެ.

ހައުސިން ލޭންޑް އެންޑް އާބަން ޑިވަލޮޕްމަންޓް މިނިސްޓްރީން އިއްޔެ ގެޒެޓް ކުރި އިއުލާނެއްގައި ބުނެފައި ވަނީ ލޭންޑް ޔޫސް ޕްލޭނަށް ގެނައި ބަދަލާ ގުޅިގެން ކުރިން ގުޅިފަޅުން ގޯތި ލިބިފައިވާ ފަރާތްތަކުގެ ގޯތީގެ ލޮކޭޝަން ބަދަލުވެފައިވާ ކަމަށެވެ.

އެހެންކަމުން އެ ފަރާތްތަކުގެ އިތުރުން ގިރާފަރުފަޅުން ލިބުނު ގޯތި ގުޅިފަޅަށް ބަދަލު ކުރި މީހުންގެ މެދުގައި އަންނަ އަންގާރަ ދުވަހުގެ ހެނދުނު 9:00 ގައި ގުރުއަތު ނަގަން ނިންމާފައިވާ ކަމަށް ހައުސިން މިނިސްޓްރީން ބުނެ އެވެ. ގުރުއަތު ނަގަން ހަމަޖެހިފައި ވަނީ ދަރުބާރުގޭގެ ރަންނަބަނޑޭރި މާލަމުގަ އެވެ.

ގުރުނެގުމުގެ ކަންކަން ބެލުމަށް ވަދޭވޭނެ އިންތިޒާމު ހަމަޖެހިފައިވާކަމަށްވެސް އެ މިނިސްޓްރީން ބުނެ އެވެ. މީގެ އިތުރުން، ގުރުނެގުމުގެ އިވެންޓް ކުރިއަށްދާ ވަގުތު ޕަބްލިކް މީޑިއާއިން ލައިވް ކުރުމަށްވަނީ ހަމަޖެހިފަ އެވެ.

މިނިސްޓްރީން ބުނީ ގޯތި ލިބޭ ފަރާތްތަކުގެ ގުރުނަގާ ނިމުމުން، ގޯތިތަކުގެ ރަޖިސްޓްރީ އާއި ބިން ލިބޭ ފަރާތްތަކާއެކުވާ އެއްބަސްވުން ތަކާއިގުޅޭ މައުލޫމާތު ފަހުން ހިއްސާކުރާނެ ކަމަށެވެ.