މަޝްހޫރު ބޭންޑް ވަން ޑިރެކްޝަންގެ ކުރީގެ މެމްބަރު ލިއަމް ޕޭން މަރުވިއިރު އައީ ކައިވެންޏަށް ތައްޔާރު ވަމުން ކަމަށް އޭނާގެ ލޯބިވެރިޔާ ކޭޓް ކެސިޑީ ބުނެފި އެވެ.

ލިއަމް މަރުވި ފަހުން ފުރަތަމަ ފަހަރަށް ކޭޓް އާއްމުކުރި ބަޔާނުގައި އޭނާ ވަނީ އޭނާއާއި ލިއަމްގެ ގުޅުމުގެ މައްޗަށް އަލި އަޅުވާލާފަ އެވެ.

އެގޮތުން އެ ދެމީހުން އައީ އެމީހުންގެ ދިރިއުޅުން އެކުގައި ރާވަމުން ކަމަށާއި ދުރުނޫން މުސްތަގްބަލެއްގައި ކައިވެނި ކުރަން ވެސް ނިންމައިގެން ތިބި ކަމަށެވެ.

"އަހަންނަށް އެނގޭ އަހަރެމެން އަބަދުވެސް އެކުގައި ވާނެކަން. އެކަމަކު އަހަރެން އެންމެ ބޭނުންވި ގޮތަކަށް ނޫން" ކޭޓްގެ ބަޔާނުގައި ބުނެފައިވެ އެވެ.

ކޭޓް އިތުރަށް ބުނެފައިވަނީ ލިއަމްގެ ހަނދާންތަކާއި އެމީހުން އެކުގައި ހޭދަކުރި ދުވަސްތައް އޭނާގެ ހަނދާނުން ދުވަހަކުވެސް ފޮހެވިގެން ނުދާނެ ކަމަށެވެ.

އެއާއެކު ލިއަމްގެ މަރާއެކު އޭނާގެ ހަޔާތް ބަނަވެ އަނދިރި ވެފައިވާ ކަމަށާއި މުސްތަގްބަލް އޮތީ ކިހިނެއް ކަމެއް ހުދު އޭނާއަށް ވެސް ނޭނގޭ ކަމަށް ކޭޓް ބުނެފައިވެ އެވެ.

ލިއަމް މަރުވެފައިވަނީ އޮކްޓޯބަރު މަހުގެ 16 ވަނަ ދުވަހު އާޖެންޓީނާގެ ހޮޓަލެއްގެ ބެލްކަނިން ވެއްޓިގެންނެވެ. އެ ހާދިސާ ހިނގިއިރު އޭނާ ހުރީ މަސްތުގެ ހާލަތުގައި ކަމަށް ތަހުގީގު ރިޕޯޓުތަކުން ދައްކަ އެވެ.