ރައްޔިތުން މަޖިލީހުގެ ކުރީގެ ނައިބު ރައީސް ރީކޯ މޫސާ މަނިކުގެ ހެވީ ލޯޑް ކުންފުނީގެ ތިން ރިސޯޓެއް ވިއްކާލަން ބޭންކް އޮފް މޯލްޑިވްސް (ބީއެމްއެލް) އިން ނީލަމަށް ލައިފި އެވެ.

މި ތިން ރިސޯޓުވެސް ވިއްކާލަން ބީއެމްއެލްއިން ނީލަމަށް ލާފައި ވަނީ ރީކޯ މޫސަގެ ކުންފުނިން ނަގާފައި އޮތް ލޯނުތަކެއް ނުދައްކައިގެންނެވެ.

މީގެ ކުރިން ލޯނެއްގެ މައްސަލައިގައި ރީކޯ މޫސަގެ ކުންފުނީގެ ނަމުގައި އޮތް ކޮޅުވެއްޓިއެއްވެސް ބީލަމުގައި ވިއްކާލަން ބީއެމްއެލްއިން ވަނީ އިއުލާންކޮށްފަ އެވެ.

ވިއްކާލަން އިއުލާނުކޮށްފައިވަނީ ލ. ފަރެސް އައިލެންޑާއި ކުޑަ ފަރެސް އައިލެންޑް އަދި ބޮޑުހުރާ އައިލެންޑެވެ. އޭގެ ތެރެއިން ފަރެސް އާއި ކުޑަފަރެސްއަކީ ރަހާ ރިސޯޓް ހިންގަމުންދާ ދެ ރަށެވެ. އަދި ބޮޑުހުރާއަކީ ދަނޑުވެރި ކަމަށް ދޫކޮށްފައި އޮންނަ ރަށެކެވެ.

އެ ރަށްތައް ވިއްކާލަނީ ބީއެމްއެލް އިން ނެގި 11 މިލިއަން ޑޮލަރު (170 މިލިއަން ރުފިޔާ) ލޯނަކަށް ފައިސާ ނުދެއްކުމުންނެވެ.

ބީއެމްއެލް އިން ވަނީ އެރަށްތައް ވިއްކާލުމަށް ދެ އޮޕްޝަނެއް ދީފަ އެވެ. ފުރަތަމަ އޮޕްޝަނުގައިވާ ގޮތުން ތިން ރަށް އެއްކޮށް ގަތުމަށް ހުށަހަޅަންޖެހޭ އެންމެ ކުޑަ އަގަކީ 23.2 މިލިއަން ޑޮލަރު (355 މިލިއަން ރުފިޔާ) އެވެ. ދެވަނަ އޮޕްޝަނުގައިވާ ގޮތުން ލ.ފަރެސް އާއި ކުޑަ ފަރެސް އަދި ބޮޑުހުރާ ވަކިން ގަނެވިދާނެ އެވެ. އެގޮތަށް ގަތުމަށް ވެސް ހުށަހެޅޭނެ އެންމެ ކުޑަ އަގަކީ 23.2 މިލިއަން ޑޮލަރެވެ.

ބީއެމްއެލްގެ އިއުލާނުގައިވާގޮތުން ޕްރޮޕޯސަލް ހުށަހެޅުމުގެ ސުންގަޑިއަކީ 28 ނޮވެމްބަރ 2024 ވާ ބުރާސްފަތި ދުވަހުގެ މެންދުރު 12:00 އެވެ.

ރީކޯ މޫސައަކީ ވިޔަފާރިވެރިއެއްގެ އިތުރުން އެމްޑީޕީ ޗެއާޕާސަންކަންވެސް ކުރެއްވި ބޭފުޅެކެވެ. ފަހުން ޕީޕީއެމްގެ ވެރިމަކުގައި ޕީޕީއެމްއާއެކު ހުންނެވުމަށްފަހު ވެރިކަން ބަދަލުވުމުން، މިދިޔަ ދައުރުގައި ރައީސް އިބްރާހިމް މުހައްމަދު ސޯލިހު އަރިހުގައި ހުންނެވި އެވެ. ނަމަވެސް މިހާރު ރީކޯ މޫސަ ސިޔާސީ މައިދާނުން ނުފެނެ އެވެ.