ކާބޯތަކެތި ތައްޔާރު ކުރުމުގައި ކާ ތަކެއްޗަށް ކުޅު ޖަހައި، ކުޑަކަމުދާ ތަކެތި އަޅާ ފަރާތްތައް ބޮޑު އަދަދުން ޖޫރިމަނާ ކުރާނެ ކަމަށް އިންޑިއާގެ ވެރިކަން ކުރާ ބާރުތިޔާ ޖަނަތާ ޕާޓީ (ބީޖޭޕީ) ގެ ވެރިކަން އޮންނަ ދެ ސްޓޭޓަކުން އިއުލާންކޮށްފި އެވެ.

އުތުރުގެ އުއްތަރަކަންޑް ސްޓޭޓުން ބުނެފައި ވަނީ ކާ ތަކެއްޗަށް ކުޅު ޖަހައި ކުޑަކަމުދާ ތަކެތި އަޅާ ފަރާތްތައް 100،000 ރުޕީސް (1،190 ޑޮލަރު) އިން ޖޫރިމަނާ ކުރާނެ ކަމަށެވެ. އަދި އަވަށްޓެރި އުއްތަރަ ޕްރަދޭޝް އިން ވަނީ މި މައްސައާ ގުޅިގެން ހަރުކަށި ގާނޫނެއް ތައާރަފްކޮށްފަ އެވެ.

ސްޓޭޓުގެ ސަރުކާރުތަކުން ހަރުކަށި ފިޔަވަޅުތައް އަޅާނެކަން އިއުލާންކޮށްފައި ވަނީ ކާބޯތަކެތި ތައްޔާރުކުރުމުގައި ވަރަށް ނުސާފު ގޮތްތަކެއް ބޭނުންކުރާ ވީޑިއޯތަކެއް އާއްމުވުމާ ގުޅިގެންނެވެ. މިފަދަ އެއް ވީޑިއޯއަކުން ވަނީ ކާތަކެތި ތައްޔާރުކުރާ ބަޔަކު އެ އެއްޗިއްސަށް ކުޅު ޖަހާ މަންޒރު ފެނިފަ އެވެ. އަދި އަނެއް ވީޑިއޯތަކުން ވަނީ އަންހެނަކު ކާ އެއްޗެއް ތައްޔާރު ކުރަމުންދިޔަ އިރު އެއާ އެކު ކުޑަކަމުދާ ތަކެތި މިކްސް ކުރަމުންދާ މަންޒަރު ފެނިފަ އެވެ.

ސޯޝަލް މީޑިއާގައި މި ވީޑިއޯތައް އާއްމުވުމާ ގުޅިގެން އެތައް ބަޔަކު ވަނީ ރުޅިގަދަވެފަ އެވެ. ޚާއްސަކޮށް އިންޑިއާގައި ކާބޯތަކެތި ތައްޔާރުކުރުމުގައި ސާފުތާހިރުކަމުގެ މިންގަނޑާ މެދު ވަނީ ވަރަށް ބޮޑަށް ސުވާލު އުފައްދައިފަ އެވެ. ޚާއްސަކޮށް ސްޓްރީޓް ފުޑް ނުވަތަ މަގު މަތީގައި ވިއްކާ ކާތަކެއްޗެވެ.

އިންޑިއާގެ ފުޑް ސޭފްޓީ އެންޑް ސްޓޭންޑާޑް އޮތޯރިޓީން ބުނެފައި ވަނީ ނުސާފު ކާބޯތަކެތި ކައިގެން އެ ގައުމުގައި އަހަރެއްގެ ތެރޭ 600 މިލިއަން މީހުން ބަލިވާ ކަމަށެވެ. އަދި 400،000 މީހުން މަރުވާ ކަމަށެވެ.