މިހާރު ފިޓްނަސް ޓްރެއިނަރެއްގެ ގޮތުގައި މަސައްކަތްކުރާ އެމެރިކާގެ އަންހެނެއް ކަމަށްވާ ތާރާ ޑިކްސަންގެ ދިރިއުޅުމަކީ މީގެ އަހަރުތަކެއް ކުރިން މުޅިން ތަފާތު ދިރިއުޅުމެކެވެ.

އެހެން ނަމަވެސް އޭނާގެ ދިރިއުޅުމަށް ގެނައި ބަދަލުތަކުގެ ތެރެއިން ތާރާ ވަނީ އެންމެ 24 ހަފްތާގެ ތެރޭގައި އޭނާގެ ހަށިގަނޑުން 31 ކިލޯ ލުއިކޮށްފަ އެވެ. އެއީ ގާތްގަނޑަކަށް ހަ މަސް ދުވަހެވެ.

އެހާ ކުޑަ ދުވަސްކޮޅަކުން ބަރުދަނަށް ބޮޑު ބަދަލެއް ގެންނަން ބޭނުންކުރި އުކުޅުތައް ތާރާ ވަނީ އޭނާގެ އިންސްޓަގްރާމް ޕޭޖުގައި ހިއްސާކޮށްފަ އެވެ.

އެގޮތުން އެ ލަނޑުދަނޑި ހާސިލް ކުރުމަށްޓަކައި އޭނާގެ ދިރިއުޅުމަށް ގެނައީ މައިގަނޑު ތިން ބަދަލެއް ކަމަށް ތާރާ ބުނެފައިވެ އެވެ.

ފުރަތަމަ ކަމަކީ ކެލޮރީ ޑެފިސިޓް ޑައިޓެއް ގެންގުޅުމެވެ. ކެއުމުގައި ހިމަނަންޖެހޭ އެއްވެސް މާއްދާއެއް މަދުނުކޮށް ހަށިގަނޑަށް އެތެރެވާ ކެލޮރީ ވަކި މިންވަރެއްގައި ހިފެހެއްޓުމެވެ. ތާރާ ބުނާ ގޮތުގައި ޗޮކުލެޓް ކާހިތްވާނަމަ ކެލޮރީ ލިމިޓް ތެރޭގައި އެ ކެއުމަކީ މައްސަލައެއް ނޫނެވެ.

ދެވަނަ ކަމަކީ ކޮންމެ ދުވަހަކު ވެސް މަދުވެގެން 10،000 ފިޔަވަޅު ހިނގުމެވެ. ތާރާ ބުނީ ދިރިއުޅުން ބައްޓަންވެފައި ހުރިގޮތުން ހިނގެނީ މަދު ފަހަރެއްގައި ކަމަށާއި އެހެން ނަމަވެސް މިހާރު ހިނގުމަކީ އޭނާ އެންމެ ލޯބިކުރާ އެއް ކަންތައް ކަމަށެވެ.

އެއާއެކު ދެން ތާރާގެ އުކުޅަކަށްވީ ކްރޮސް ޓްރެއިނިން ކްލާސްތަކެވެ. ކާޑިއޯ ކަސްރަތުތަކާއި ބަރު އުފުލުމުގެ ކަސްރަތުތައް ވެސް ހިމެނޭހެން ނަގަން ފެށި އެ ކްލާސްތަކުން އޭނާގެ ބުންވަރު އިތުރުވެ ސަރުބީ ވިރުވުން އަވަސްވި ކަމަށް ތާރާ ބުނެފައިވެ އެވެ.

މި ދެތިން ބަދަލު ގެނެސްގެން ވަރަށް ކުރު މުއްދަތެއްގައި ދިރިއުޅުން ވަރަށް ބޮޑަށް ބަދަލު ކުރެވިދާނެ ކަމަށާއި އެއީ ކޮންމެ މީހަކަށް ވެސް ކުރެވިދާނެ ކަމެއް ކަމަށް ތާރާ ބުންޏެވެ.