އަލަށް ހިއްކަން މަސައްކަތް ކުރާ ފުށިދިއްގަރުފަޅާއި މާލެ ކަނޑުއަޑީގެ ޓަނަލަކުން ގުޅާލުމުގެ ވާހަކައާއެކު، ރައީސް މުހައްމަދު މުއިއްޒު އާއި ކޮންސްޓްރަކްޝަން މިނިސްޓަރު އަބްދުﷲ މުއްތަލިބުގެ ދެއްކެވި ވާހަކަ ދިމާނުވެ ސަރުކާރު ހޫނުފެނަށް ވެއްޓިއްޖެ އެވެ.

އިއްޔެ ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި ވިދާޅުވީ އަންޑާވޯޓާ ޓަނަލްއަކީ ރައީސް މުއިއްޒުގެ ވަރަށް މުއްސަނދި ތަސައްވުރެއް ކަމަށެވެ. އެ ތަސައްވުރަކީ އެމެރިކާ މީހުން ހަނދަށް ދިޔުން ފަދަ ކަމެއްގެ ގޮތުގައި މިނިސްޓަރު ވަނީ ސިފަކުރައްވާފަ އެވެ.

ފުށިދިއްގަރުފަޅު ނުވަތަ ރަސްމާލެއާ ހަމައަށް ޓަނަލެއް އެޅުމަކީ މީގެ ކުރިން ދުނިޔޭގައި ކޮށްފައި ނުވާ ފަދަ ބޮޑު މަސައްކަތެއް ކަމަށް މުއްތަލިބު ވިދާޅުވި އެވެ.

"މިވަގުތު ދުނިޔޭގެ އެއްވެސް ތަނެއްގައި، އޯޕަން ސީގައި ހަދާފައި އޮތް ކަހަލަ އިންފްރާސްޓްރަކްޗާއެއްގެ ވާހަކައެއް ނޫން މި ދައްކަނީ. ތިބޭފުޅުންނަށް އެނގިވަޑައިގަންނަވާނެ އެމެރިކާއިން ހަނދަށް ދިޔުމަށް ވެސް ޖޯން އެފް ކެނެޑީ އެންވިޝަން ކުރެއްވީ އެއްވެސް ބަޔަކު ހަނދަށް ގޮސްގެނެއް ނޫން،" މިނިސްޓަރު ވިދާޅުވި އެވެ.

މުއްތަލިބު ވިދާޅުވީ އެ ޓަނަލް އެޅުމުގެ މަސައްކަތަކީ ޓައިމްލައިނެއް ހަދައިގެން ކުރިއަށް ގެންދެވޭނެ ޕްރޮޖެކްޓެއް ނޫންކަމަށެވެ. އޭނާ ވިދާޅުވީ އެއީ އެއަށްވުރެ މާ އާދަޔާ ހިލާފު މަސައްކަތެއް ކަމަށެވެ.

ނަމަވެސް މި ޓަނަލް އަޅާ ވާހަކަ ރައީސް މުއިއްޒު މިއަހަރުގެ ޖެނުއަރީ މަހު ދެއްކެވިއިރު ވިދާޅުވީ ރަސްމާލެ ޓަނަލްއަކުން ގުޅުވާލުމަށްޓަކައި މިހާރު ފަންނީ ވަރަށް ގިނަ މަސައްކަތްތަކެއް، އިނޮވޭޓިވް މަސައްކަތްތަކެއް ވާނީ ފަށާފައި ކަމަށާއި އެކަމަށް ވަރަށް ގާބިލް ކުންފުނިތަކާއެކު މަޝްވަރާ ފަށާފައިވާ ކަމަށެވެ. ރައީސް ވީދާޅުވީ މި ޓަނަލް ވެގެން ދާނީ މުޅި ދުނިޔޭގައިވެސް ފުރަތަމަ ފަހަރަށް ގާއިމުކުރެވޭ އަންޑާ ވޯޓާ ޓަނަލަށް ކަމަށެވެ.

"އެ ޓަނަލް ވެގެންދާނީ، އެ ޓަނަލްގައި ދުއްވާ ޓްރެއިންގެ ސަބަބުން، ޓްރެއިންގައި ދާއިރުގައި ކަނޑުއަޑީގެ ރީތި މަންޒަރުތައް ވެސް ފެންނަ ޓަނަލަކަށް. އެ މަސައްކަތް ކުރުމަށްޓަކައި އަޅުގަނޑުމެން އެކަމުގެ ގާބިލްކަން ހުރި ކުންފުނިތަކާ އެކީގައި މިހާރު ވަނީ ފީޒިބިލިޓީ މަސައްކަތް ފަށާފައި،" ރައީސް މުއިއްޒު އޭރު ވިދާޅުވެފައިވެ އެވެ.

ސަރުކާރުގެ ދިމާނުވާ މި ވާހަކަތަކާއެކު ގިނަ ބަޔަކު ދަނީ ފާޑު ކިޔަމުންނެވެ. ރައީސް މުއިއްޒު އެކަން އިއުލާން ކުރެއްވިއިރު، އެކަމާއި ގުޅޭ މަސައްކަތްތައް ފައްޓަވާފައިވާކަމަށް ވިދާޅުވިނަމަވެސް އިއްޔެ މިނިސްޓަރުވަނީ އެއީ ރައީސްގެ ތަސައްވުރެއްކަމަށް ވިދާޅުވެފަ އެވެ.