ގިނަ ބައެއްގެ ލޯބި ހޯދާފައިވާ ހޮލީވުޑްގެ އެކްޓަރު މެތިއު ޕެރީ ކުއްލި ގޮތަކަށް މަރުވުން ވެގެންދިޔައީ ހޮލީވުޑްގެ އިތުރުން ދުނިޔޭގެ އެކި ކަންކޮޅުތަކުގައި ތިބި އޭނާއަށް ސަޕޯޓުކުރާ މީހުންނަށް ލިބުނު ސިހުމަކަށެވެ.

މިދިޔަ ހޯމަ ދުވަހު މެތިއު މަރުވިތާ އެއް އަހަރު ފުރުނުއިރު އޭނާގެ އާއިލާއިން މިވަނީ މެތިއުގެ މަރާ ގުޅިގެން ހިނގައިދިޔަ އަދި ހިނގަމުން އަންނަ ކަންކަން ތަހައްމަލް ކުރަމުން އަންނަ ގޮތް މީޑިއާއަށް ކިޔައިދީފަ އެވެ.

މި ހަފްތާގެ ޕީޕަލް މެގަޒިންއަށް ދިން އިންޓަވިއުއެއްގައި މެތިއުގެ ދޮން ބައްޕަ ކެއިތު މޮރިސަން ބުނީ ފާއިތުވި އަހަރަކީ އެ އާއިލާއަށް ވަރަށް އުނދަގޫ އަހަރެއް ކަމަށެވެ.

"އޭނާގެ މަރާ ގުޅިގެން ފެންމަތިވި މައުލޫމާތުތަކަކީ އަހަރުމެންނަށް ގަބޫލު ކުރަން ދަތި، ހިތްދަތި މައުލޫމާތު ތަކެއް" މޮރިސަން ބުންޏެވެ.

އެގޮތުން މެތިއުގެ މަރާ ގުޅިގެން ފެންމަތިވި ހަގީގަތްތަކުން އާއިލާގެ މެމްބަރުންގެ ހިތްތަކުގައި ރުޅިވެރިކަން އުފެދިފައިވާ ކަމަށާއި ކުށްވެރިންނަށް ހައްގު އަދަބު ލިބޭނެ ކަމަށް އުއްމީދުކުރާ ކަމަށް ވެސް އޭނާ ބުނެފައިވެ އެވެ.

މެތިއު މަރުވީ އޭނާގެ ފާހާނާ ތެރޭގައި ހުރި ބިލިގާގައި އޮވެ ގެނބިގެން ކަމަށް އެންމެ ފުރަތަމަ ބެލެވުނު ނަމަވެސް އޮޓޯޕްސީ ރިޕޯޓުން ހާމަވި ގޮތުގައި އޭނާ މަރުވީ ޑްރަގް އޯވާޑޯޒް ވެގެންނެވެ.

އެ މައްސަލައިގައި ޖުމްލަ ފަސް މީހަކު ހައްޔަރު ކުރެވިފައިވާއިރު އޭގެ ތެރޭގައި މެތިއުގެ ދެ އެސިސްޓަންޓުންނާއި ދެ ޑޮކްޓަރުން ވެސް ހިމެނެ އެވެ.

އެންމެ ބޮޑަށް އިތުބާރުކުރި ގާތް މީހުންގެ ފަރާތުން އެފަދަ އަނިޔާއެއް ލިބުނުކަން އެނގުމަކީ އާއިލާގެ ހިތްދަތިކަން ބޮޑުވި ކަމެއް ކަމަށް މޮރިސަން ބުންޏެވެ.

މެތިއު މަޝްހޫރުވެފައިވަނީ 1994 ން 2004 އަކަށް ކުރިއަށްދިޔަ މަގުބޫލު ސިޓްކޮމް "ފްރެންޑްސް"ގައި އޭނާ ދައްކުވައިދިން ރޯލުންނެވެ.

މެތިއުގެ މަރަށް އެއް އަހަރު ފުރުމާއެކު އެ ޝޯގައި އޭނާއާއެކު މަސައްކަތްކުރި އެކްޓަރެއް ކަމަށްވާ ޖެނިފާ އެނިސްޓަން ވަނީ އޭނާގެ ސޯޝަލް މީޑިއާގައި މެތިއުއަށް ހާއްސަ ޕޯސްޓެއް ކޮށްފަ އެވެ.