ނިމިދިޔަ ރައީސް އިބްރާހިމް މުހައްމަދު ސޯލިހުގެ ސަރުކާރުން އިންޑިއާގެ އިންދިރާ ޕްރޮޖެކްޓްސްއާ ހަވާލުކުރި ރާއްޖޭގައި 61 ޕޮލިސް ސްޓޭޝަން އެޅުމުގެ މަސައްކަތް ކުރިއަށްނުދާ ކަމަށާއި އެ ކުންފުނިން މާލޭގައި ކުރާ ހަމައެކަނި ކަމަކީ މޫނިމާގެ ކިޔައި ގެއެއް ހެދުން ކަމަށް ވިދާޅުވެ އެމްޑީޕީގެ ޗެއާޕާސަން އަދި ކުރީގެ އިކޮނޮމިކް މިނިސްޓަރު ފައްޔާޒު އިސްމާއީލަށް ހޯމްލޭންޑް މިނިސްޓަރު އަލީ އިހުސާން ތުހުމަތު ކުރެއްވި މައްސަލަ ބަލައިދޭން ފައްޔާޒު އެދިއްޖެ އެވެ.

އިހުސާންގެ އެ ތުހުމަތުތަކާއި ގުޅިގެން ފައްޔާޒުވަނީ އެންޓި ކޮރަޕްޝަން ކޮމިޝަން (އޭސީސީ) އަށާއި ފުލުހަށް ވެސް އެކަން ބަލާދިނުމަށް އެދި ސިޓީ ފޮނުވާފަ އެވެ.

ޕޮލިސް ސްޓޭޝަން އެޅުމުގެ ޕްރޮޖެކްޓާ ގުޅުވައި އޭނާއަށް ކޮރަޕްޝަންގެ ތުހުމަތުކުރާތާ އަހަރެއް ވާން ގާތްވެފައިވާ ކަމަށާއި ނަމަވެސް ރައްޔިތުންގެ ފައިސާއާ ގުޅޭ އެ ފަދަ ކަމެއްގައި މިހައިތަނަށް އެއްވެސް ސުވާލެއްކޮށް ތަހުގީގެއް ހިންގައިފައިނުވާކަމަށް ފުލުހުންނަށް ފޮނުވި ސިޓީ ފައްޔާޒު ވިދާޅުވެފައިވެ އެވެ. އަދި އެ ތުހުމަތުތައް ކުރަނީ ޖަވާބުދާރީ ނުވެވޭ ގޮތަށްކަމަށް ވެސް އޭނާ ބުނެފައިވެ އެވެ.

އެ ކަމާ ގުޅޭ ތަހުގީގެއް ހިންގާނަމަ އެ ކަމުގެ ހަގީގަތް ހާމަކޮށްދިނުމަށާއި އެކަމަށް އެއްބާރުލުން ދޭނެކަމަށް ފައްޔާޒުގެ ސިޓީގައި ވިދާޅުވެފައިވެ އެވެ.

ފުލުސް އޮފީހުގެ އިތުރުން އޭސީސީއަށްވެސް ފައްޔާޒުވަނީ މި މައްސަލައިގައި ސިޓީ ފޮނުވާއްވާފަ އެވެ. އެ ސިޓީގައި އެދިފައިވަނީ އެ ކަމުގެ ހަގީގަތް ހާމަކޮށްދީ އޭނާއަށް ޖަވާބުދާރީވެވޭނެ ގޮތެއް ފަހިކޮށްދޮނުމަށެވެ.

ރައްޔިތުންގެ މަޖިލީހުގެ މެންބަރަކު ސުވާލުކުރަން އިއްޔެ މަޖިލީހަށް މިނިސްޓަރު އިހުސާން ހާޒިރުކުރުމުން ވާހަކަ ދައްކަވަމުން އޭނާ ވިދާޅުވީ އިންދިރާ ޕްރޮޖެކްޓްސްއިން ކުރަނީ އެންމެ މަސައްކަތެއްކަމަށާއި އެއީ، ބިގް ކުންފުނީގެ ހިއްސާ ގަނެގެން މޫނިމާގެ ހެދުމުގެ މަސައްކަތް ކަމަށެވެ.

ފައްޔާޒު ވިދާޅުވި ގޮތުގައި މީގެ ކުރިން ވެސް އެ ކަމުގައި ދޭން ޖެހޭ ޖަވާބުތައް އެކި ޕްލެޓްފޯމްތަކުގައި ވަނީ ދީފަ އެވެ.

"ތަހުގީގީ އިދާރާތަކުގެ ބެލެނިވެރި ވަޒީރަކަށް އިހުސާން ހުންނަވާތާ އަހަރެއްވާއިރު، އެއްވެސް ތަހުގީގެއް ނުކޮށް، ދައުވާއެއް ނުއުފުލައި މިފަދަ ތުހުމަތުތަކެއް ކުރުމަކީ ޒިންމާދާރުކަން ކުޑަ އަމަލެކެވެ" ފައްޔާޒު ވިދާޅުވި އެވެ،