ދުނިޔޭގެ އެކި ކަންކޮޅުތަކުން ބައިވެރިވާ ރީތީގެ މުބާރާތް، މިސް ޔުނިވާސްގައި ރާއްޖެއިން ފުރަތަމަ ފަހަރަށް ބައިވެރިވެއްޖެ އެވެ.

މިސް ޔުނިވާސް މުބާރާތުގައި ރާއްޖެ ތަމްސީލްކުރަނީ 21 އަހަރުގެ މޮޑެލްއެއް ކަމަށްވާ މަރިޔަމް ޝައިނާ ނަސީމެވެ.

މި އަހަރުގެ މިސް ޔުނިވާސް މުބާރާތް ބޭއްވުމަށް ހަމަޖެހިފައިވަނީ ނޮވެމްބަރު 14 އިން 16 އަށް މެކްސިކޯގަ އެވެ.

ޝައިނާ މިސް ޔުނިވާސްގައި ބައިވެރިވިކަން ހާމަކޮށްފައިވަނީ އިންޑިއާގައި ހުންނަ މެކްސިކޯގެ އެމްބަސީން މިއަދު އެކްސްގައި ކުރި ޕޯސްޓެއްގަ އެވެ. އެ ޕޯސްޓުގައި ބުނީ މި އަހަރުގެ މިސް ޔުނިވާސްގައި ރާއްޖެއިން ވާދަކުރާ ޝައިނާ އަށް، މި މުބާރާތުގައި ވާދަކުރުމަށް މެކްސިކޯ އަށް ދިއުމަށް ވިސާ ހަމަޖައްސާދީފައިވާ ކަމަށެވެ.

https://x.com/EmbaMexInd/status/1851250018084180081

ޝައިނާ އަކީ "ޓޮޕް މޮޑެލް މޯލްޑިވްސް 2022" ކާމިޔާބުކުރި މޮޑެލް އެވެ. ޝައިނާ ވަނީ މިދިޔަ އަހަރު މިސްރުގައި ބޭއްވި "ވޯލްޑް ޓޮޕް މޮޑެލް"ގައި ވެސް ބައިވެރިވެ، ގަދަ 15 ގައި ހިމެނިފަ އެވެ. އެއީ އެ މުބާރާތުގެ ގަދަ 15 ގައި ރާއްޖެ ހިމެނުނު ވެސް ފުރަތަމަ ފަހަރެވެ. އަދި އެ މުބާރާތުގައި "ނިއު ފޭސް"ގެ އެވޯޑު ވެސް ޝައިނާއަށް ވަނީ ލިބިފަ އެވެ.

https://www.instagram.com/p/Co1ejKmpMu4/?igsh=YnZmb3VxNzQycDdk

މި މުބާރާތުގައި ވާދަކުރުމަށް ޝައިނާ މިހާރު ހުރީ މެކްސިކޯގައި ކަމަށްވެ އެވެ.

މިއަހަރުގެ މިސް ޔުނިވާސް މުބާރާތުގައި 130 ގައުމަކުން ބައިވެރިވެ އެވެ. ރާއްޖޭގެ އިތުރުން މި މުބާރާތުގައި އަލަށް ބައިވެރިވާ ގައުމުތަކުގެ ތެރޭގައި، ސޯމާލިއާ، ބެލަރޫސް، އިރާން، އުޒްބަކިސްތާން އަދި ޔުނައިޓެޑް އަރަބް އެމިރޭޓްސް ހިމެނެއެވެ.