މަސްވެރީންނަށް ދޭންޖެހޭ ފައިސާގެ ބެކްލޮގް މާދަމާއަށް ކްލިއާކޮށް މަސްވެރިންގެ ފައިސާ ދޫކުރެވޭނެ ކަމަށް ފިޝަރީޒް މިނިސްޓަރު އަހްމަދު ޝިޔާމް ވިދާޅުވެއްޖެ އެވެ.

މިނިސްޓަރު މިހެން ވިދާޅުވީ، ރައްޔިތުންގެ މަޖިލީހުގެ މިއަދުގެ ޖަލްސާގައި މަސްވެރިން ވިއްކި މަހަށް ދައްކަންޖެހޭ ފައިސާ ދައްކާ ނިމޭނެ ދުވަހަކާ ގުޅޭ ގޮތުން ތިނަދޫ އުތުރު ދާއިރާގެ މެންބަރު ސައުދުﷲ ހިލްމީ ކުރެއްވި ސުވާލަކަށް ޖަވާބު ދެއްވަމުންނެވެ.

ޝިޔާމް ވިދާޅުވީ މިއަދު ފިނޭންސް މިނިސްޓްރީން އެ ފައިސާ ޖަމާކޮށްދެއްމުން އެބަ ދާކަމަށާއި އެ ހުރިހާ ފައިސާއެއް މާދަމާގެ ނިޔަލަށް ދީ، އެންމެ ފަހުގެ ބެކްލޮގް އެއްކޮށް ކްލިއާ ކުރާނެ ކަމަށެވެ.

އޭނާ ވިދާޅުވީ މިހާރު މަސްވެރިންނަށް ނުދެއްކި ބާކީ ހުރީ 16 މިލިއަން ރުފިޔާ ކަމަށެވެ.

މަސްވެރިން ބާނާ މަސް ގަތުމަށްފަހު 48 ގަޑިއިރުގެ ތެރޭގައި ފައިސާ ދިނުމަކީ ރައީސް މުހައްމަދު މުއިއްޒުގެ ރިޔާސީ ވައުދުފުޅެކެވެ. ނަމަވެސް ސަރުކާރުން މަސްވެރިންނަށް ފައިސާ ދިނުން ލަސްވުމަކީ މަސްވެރިންގެ ވަރަށް ބޮޑު ޝަކުވާއެކެވެ.

އެ ވައުދާއި އެއްގޮތަށް ސަރުކާރަށް އަމަލު ނުކުރެވޭތީ އިދިކޮޅު ބައެއް މެންބަރުން ވަނީ މިނިސްޓަރާ ސުވާލުކުރައްވާފަ އެވެ. އެކަމާއި ގުޅިގެން ޝިޔާމް ވިދާޅުވީ، އެ ވައުދަކީ ފިލައިގެންދާނެ ވައުދެއްނޫން ކަމަށާއި، އެއީ ރައީސް މުއިއްޒު ފުއްދަވާނެ ވައުދެއް ކަމަށެވެ.

17" ރުފިޔާއަށް ހުރި މަސް ކިލޯއެއް، އޭރު އޮތް އެމްޑީޕީގެ ސަރުކާރުން 25 ރުފިޔާއަށް ބޮޑުކުރީ، ރިޔާސީ އިންތިހާބު ކާމިޔާބު ނުކުރެވޭނެކަން ޔަގީންވާތީ، އެއްވެސް ދިރާސާއަކަށް ބެލުމެއްނެތި" އޭނާ ވިދާޅުވި އެވެ.

ސަރުކާރު އައިއިރު 250 މިލިއަން ރުފިޔާ މަސްވެރީންނަށް ނުދެއްކި އޮތް ކަމަށާއި، އެ ފައިސާ ދައްކަމުންގޮސް ނިންމާފައިވާ ކަމަށްވެސް ޝިޔާމް ވިދާޅުވި އެވެ.