ހުޅުމާލެ ފަޅުތެރޭގައި އޮތް ސަފާރީއެއްގައި ރޯވެ އަނދައި ހުލިވެއްޖެ އެވެ.

މި ހާދިސާގައި އެއްވެސް މީހަކަށް ގެއްލުމެއް ނުލިބެ އެވެ.

އެމްއެންޑީއެފް އިން ބުނީ ހުޅުމާލެ ފަޅުތެރޭގައި، ވެމްކޯ ޖެޓީ ސަރަހައްދުގައި ސަފާރީތައް އަޅާ ސަރަހައްދުގައި އޮތް "ބުލޫވޭގާ" ނަމަކަށް ކިޔާ ސަފާރީއެއްގައި އަލިފާން ރޯވި ކަމުގެ ރިޕޯޓް ލިބިފައި ވަނީ ރޭ ފަތިހު 3:42 ހާއިރު ކަމަށެވެ. މި ހާދިސާގެ މައުލޫމާތު ލިބުމާއެކު ފަޔާ ފައިޓަރުން އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ފެށި ކަމަށް ވެސް އެމްއެންޑީއެފް އިން ބުންޏެވެ.

އެމްއެންޑީއެފް އިން ބުނީ މި ހާދިސާ ހިނގިއިރު އެ ސަފާރީގައި ތިބި 12 ފަޅުވެރިން ކަމަށެވެ. އަދި އެ މީހުން ކައިރީގައި އޮތް ޑައިވިން ދޯންޏަކަށް އަރާފައިވާ ކަމަށް އެމްއެންޑީއެފް އިން ބުނެ އެވެ.

އެ ވަގުތު އެ ސަފާރީގައި ތިބި ފަޅުވެރިންނަކީ ފަސް ބިދޭސީން (ސްރީލަންކާ، ބަންގްލަދޭޝް އަދި އިންޑިއާ) އާއި ހަތް ދިވެހިން ކަމަށް އެމްއެންޑީއެފް އިން ބުނެ އެވެ.

ސަފާރީގައި ރޯވި އަލިފާން ނިންވުމުގެ މަސައްކަތް އެމްއެންޑީއެފުން ކުރަނީ --- ފޮޓޯ: އެމްއެންޑީއެފް

"ސަފާރީގައި އަލިފާން ރޯވި އިރު އޭގައި ހުރީ ޑައިވިން ކުރުމަށް ބޭނުންކުރާ ސާމާނުކަން އެ ސަފާރީގެ ކެޕްޓަން މައުލޫމާތު ދޭ. މިހާތަނަށް މި ހާދިސާގައި އެއްވެސް މީހަކަށް އަނިޔާއެއް ލިބިފައިވާކަމަށް މައުލޫމާތެއް ނުލިބޭ. ނަމަވެސް ސަފާރީ ވަނީ އަލިފާން ރޯވުމުގެ ސަބަބުން ވަރަށް ބޮޑަށް ހަލާކުވެފައި،" އެމްއެންޑީއެފް އިން ބުންޏެވެ.

މި ހާދިސާގައި ސަފާރީ ވަނީ އެއްކޮށް އަނދާފަ އެވެ.