ޖެނިފާ އެނިސްޓަންއާއި ކޯޓްނީ ކޮކްސްއަކީ މަޝްހޫރު ސީރީޒް "ފްރެންޑްސް"ގައި އެކުގައި މަސައްކަތްކުރި ގާތް ދެ އެކުވެރިންނެވެ. މިއަދާ ހަމައަށް ވެސް އެ ދެމީހުންގެ އެކުވެރިކަމަށް އެއްވެސް ބަދަލެއް ނާދެ އެވެ.

އެގޮތުން ދާދި ފަހުން ކޯޓްނީ ވަނީ އޭނާގެ ގާތް ރަހުމަތްތެރިޔާ ޖެނިފާގެ "ސިއްރެއް" މީޑިއާގައި ފަޅާ އަރުވާލާފަ އެވެ. ކޯޓްނީ ބުނީ "ފްރެންޑްސް"ގެ ސެޓުން ގިނަ ހެދުންތަކެއް ޖެނިފާ ނަގާފައިވާ ކަމަށެވެ.

މީގެ ވިއްސަކަށް އަހަރު ކުރިން ކުރިއަށް ދިޔަ ފްރެންޑްސްއަކީ އެ ސީރީޒްގެ ކޮސްޓިއުމް ޑިޒައިނިންގެ ސަބަބުން އާއްމުންގެ ތައުރީފު ލިބިފައިވާ ޝޯ އެކެވެ.

އެ ޝޯގައި ކޯޓްނީ ކުޅެދިން "މޮނިކާ"ގެ ކެރެކްޓަރާއި ޖެނިފާ ކުޅެދިން "ރޭޗަލް"ގެ ކެރެކްޓަރު ބޭނުން ކޮށްފައިވާ ހެދުންތަކަކީ އޭރަށް ބަލާއިރު އެންމެ ޒަމާނީ ފަހުގެ ފެޝަންތަކެވެ.

ކޯޓްނީ ބުނީ ޖެނިފާގެ އިތުރުން ހުދު އޭނާ ވެސް ޝޯގައި ބޭނުންކުރި ގިނަ ހެދުންތަކެއް ގެންގޮސްފައި ވާނެ ކަމަށާއި މިއަދާ ހަމައަށް ވެސް އެ ހެދުންތައް އެބަހުރި ކަމަށެވެ.

1994 ން 2004 އަށް ކުރިއަށް ދިޔަ "ފްރެންޑްސް"ގައި ކޯޓްނީއާއި ޖެނިފާގެ އިތުރުން ދެން ފެނިގެންދިޔަ ތަރިންގެ ތެރޭގައި ލިސާ ކުޑްރޯ، މެތިއު ޕެރީ، މެޓް ލެ ބްލޭންކް އަދި ޑޭވިޑް ޝްވިމާ ހިމެނެ އެވެ.

2021 ވަނަ އަހަރު ނެރުނު ފްރެންޑްސްގެ ރީޔޫނިއަންގައި އެ ތަރިންގެ ތެރެއިން ބައެއް ތަރިން ވަނީ ޝޯގެ ސެޓުން ބައެއް އެހެން އެއްޗެހި ވެސް ގެންގޮސްފައިވާ ކަމަށް އެއްބަސްވެފަ އެވެ.