ރާއްޖޭގައި ތަރައްގީ ކުރުމަށް މި ސަރުކާރުން ނިންމާފައިވާ އާބަން ސެންޓަރު ތަކުގެ މަގުސަދަކީ އެއްފަސްކުރުން ކަމަށް ހައުސިން މިނިސްޓަރު އަލީ ހައިދަރު ވިދާޅުވެއްޖެ އެވެ.

ހައިދަރު މިހެން ވިދާޅުވީ ރޭ ޕީއެސްއެމްގެ "ރާއްޖެ މިއަދު" ޕްރޮގްރާމްގައި ވާހަކަ ދައްކަވަމުންނެވެ.

މިނިސްޓަރު ވިދާޅުވީ އާބާދީއާ އެއްފަސްކުރުމުގެ ޕްރޮގްރާމެއް ރާއްޖޭގައި ހިންގައިގެން ނޫނީ ތަރައްގީ ނުވާނެ ކަމަށާއި މިހާރު އިއުލާންކޮށްފައިވާ އާބަން ސެންޓަރުތަކުގެ ގޮތުގައި ތަރައްގީކުރާ ތަންތަނުގައި މަދުވެގެން 10،000 އެއްހާ މީހުން ދިރިއުޅޭނެ ކަމަށެވެ. އަދި އެ އަށް ވުރެ މީހުން އިތުރުވެއްޖެ ނަމަ އިތުރު ހިދުމަތްތައް ފުޅާވާނެ ކަމަށް އޭނާ ވިދާޅުވި އެވެ.

މޫސުމީ ބަދަލުތަކުގެ ސަބަބުން ކުދި ރަށްރަށް ބޮޑެތި ގޮންޖެހުންތަކެއް ކުރިމަތިވާ ކަމަށާއި އެފަދަ ރަށްރަށުގެ ރައްޔިތުންނަށް ސަލާމަތުން ދިރިއުޅެވޭނީ ތިމާވެއްޓާ ރައްޓެހި ރަށްތަކެއް ތަރައްގީ ކޮށްގެން ކަމަށް އޭނާ ވިދާޅުވި އެވެ.

"މައި ރަށުގައި މީހުން އާބާދުވެއްޖެ ނަމަ ހިދުމަތް ހޯދުމަށްޓަކައި ދަތުރުކުރާކަށް ނުޖެހޭނެ. އާބާދީ އާއި ތަރައްގީ އެއްފަސްކުރުމަކީ ކުދި ރަށްރަށުގެ ރައްޔިތުން މިފަދަ ރަށްތަކަށް ބަދަލުކުރުން." ހައިދަރު ވިދާޅުވި އެވެ.

އާބަން ސެންޓަރުތައް ތަރައްގީކުރާނެ ރަށްތަށް ރައީސް މުހައްމަދު މުއިއްޒު ކަނޑައަޅުއްވާ އިއްޔެ ހައުސިން މިނިސްޓްރީން ވަނީ އިއުލާން ކޮށްފަ އެވެ. އެގޮތުން ތަރައްގީކުރުމަށް ނިންމާފައިވާ ހަތް ރަށަކީ، ރ. އުނގޫފާރު، ބ. އޭދަފުށި، ޅ. ނައިފަރު، އދ. މަހިބަދޫ، ފ. ނިލަންދޫ، ދ. ކުޑަހުވަދޫ އަދި ލ. ފޮނަދޫ އެވެ.

އާބަން ސެންޓަރު ތަރައްގީ ކުރުމަށް ސަރުކާރުން ރަށްތައް ކަނޑައެޅި ގޮތާއި މެދު އިދިކޮޅު އެމްޑީޕީންނާއި ބައެއް ފަރާތްތަކުން ދަނީ ނުރުހުން ފާޅުކުރަމުންނެވެ. އެގޮތުން ރާއްޖޭގެ ބިމުގެ ގޮތުން ބޮޑު ރަށެއްކަމަށްވާ، ލ.ގަން އެ ލިސްޓުން އުނިކޮށް އަބްދުއްރަހީމުގެ ދާއިރާ ލ.ފޮނަދޫ ހިމެނުމުން ގަމު ދާއިރާގެ ރައްޔިތުން ދަނީ ހިތްހަމަނުޖެހުން ފާޅުކުރަމުންނެވެ.

އެމްޑީޕީން ބުނެފައިވަނީ ރަށްތައް ކަނޑައެޅުމުގައި ސަރުކާރުން ރައްޔިތުންގެ ހިޔާލާ މަޝްވަރާ ހޯދާފައި ނުވާކަމަށެވެ.