އިންޑިއާގެ ބޮޑުވަޒީރު ނަރެންދްރަ މޯދީއަށް ކުޑައިމީސް ވާ ފަދަ ގޮތަކަށް ދިވެހި ރާއްޖޭގެ ސަރުކާރުގެ އިސް ބޭފުޅުންތަކެއް ވާހަކަ ދެއްކުމުން އިންޑިއާއިން ވަނީ ދިވެހި ރާއްޖޭގެ ފަތުރުވެރިކަން ބޮއިކޮޓް ކުރަން ކެމްޕެއިނެއް ފަށާފަ އެވެ.

އެ ކެމްޕެއިނުގައި އެންމެ އަޑުގަދަކޮށް ހަރަކާތްތެރިވީ ބޮލީވުޑްގެ ބައެއް ތަރިންނެވެ. އެގޮތުން ޗުއްޓީއަށް ރާއްޖެ ނައުމަށާއި ފިލްމުތަކުގެ ޝޫޓިން ރާއްޖޭގައި ނުކުރުމަށް އޭރު ވަކާލާތު ކުރި އެވެ. އެހެން ނަމަވެސް މިހާރު ބޮލީވުޑްގެ ގިނަ ތަރިންތަކެއް އަނެއްކާ ވެސް މިވަނީ ރާއްޖެ އަންނަން ފަށާފަ އެވެ.

ސަނީ ލިއޯނީ

ބޮލީވުޑް ފިލްމުތަކުން މަޝްހޫރުކަން ހޯދި ކެނެޑާއަށް ނިސްބަތްވާ ސަނީ ލިއޯނީ ވަނީ އޭނާގެ އާއިލާއާއެކު މިމަހު ރާއްޖެއަށް އައިސްފަ އެވެ. މި ދަތުރުގައި ސަނީއާއި އޭނާގެ ފިރިމީހާ ޑެނިއަލް އަލުން ކައިވެނި ވެސް ކުރި އެވެ.

އަކްޝޭ ކުމާރު

"ބޮއިކޮޓް މޯލްޑިވްސް" ކެމްޕެއިނުގައި އެންމެ އަޑުގަދަކޮށް ވާހަކަ ދެއްކި އެއް ތަރިއަކީ އަކްޝޭ އެވެ. އެހެން ނަމަވެސް އޭނާ ވެސް ވަނީ އެންމެ ފަހުން މިދިޔަ މަހުގެ ތެރޭގައި ރާއްޖެއަށް އައިސްފަ އެވެ.

ޚުޝީ އަދި ޖާންވީ ކަޕޫރު

ބޮލީވުޑްގައި އެންމެ މަޝްހޫރު ދެބެއިން ކަމަށްވާ ޚުޝީ ކަޕޫރާއި ޖާންވީ ކަޕޫރު ވެސް ވަނީ ފާއިތުވި މަހު ރާއްޖެއަށް އައިސްފަ އެވެ. އެ ދަތުރުގައި ނަގާފައިވާ ފޮޓޯތަކާއި ވީޑިއޯތައް ސޯޝަލް މީޑިއާގައި ވައިރަލްވެސްވި އެވެ.

ސޯނަމް ކަޕޫރު

މިވަގުތު ބޮލީވުޑްގެ މަސައްކަތްތަކާ ކޮންމެވެސް ވަރަކަށް ދުރުގައި ހުރި ސޯނަމް ކަޕޫރު ވެސް ވަނީ އޭނާގެ ފިރިމީހާ އާނަންދު އަހޫޖާއާއި ދަރިފުޅު ވާޔޫއާއެކު ދިވެހި ރާއްޖެއަށް އައިސްފަ އެވެ.

ކަރީނާ ކަޕޫރު

ކަރީނާ ކަޕޫރާއި ސައިފް އަލީ ޚާންގެ އިތުރުން އެ ދެމީހުންގެ ދަރިން މިހާރު ވެސް އަންނަނީ ރާއްޖޭގައި ޗުއްޓީ ހޭދަ ކުރަމުންނެވެ. އެ ޗުއްޓީގެ ފޮޓޯތައް ކަރީނާގެ ސޯޝަލް މީޑިއާގައި އާއްމުކުރެ އެވެ.

ބިޕާޝާ ބާސޫ

ފިލްމީތަރި ބިޕާޝާ ބާސޫއާއި އޭނާގެ ފިރިމީހާ ކަރަންސިން ގްރޯވާ ވެސް ދަނީ ރާއްޖޭގައި ޗުއްޓީ ހޭދަކުރަމުންނެވެ. އެމީހުން ރާއްޖެއައީ އެމީހުންގެ ދަރިފުޅު ދޭވީގެ ދެވަނަ އުފަންދުވަސް ފާހަގަކުރުމަށް ކަމަށް ބިޕާޝާ ކޮށްފައިވާ ޕޯސްޓްތަކުން އެނގެ އެވެ.