މޫސުމަށް އަންނަ ބަދަލުތަކާ ދެކޮޅަށް ކުރާ މަސައްކަތްތަކާއި ކާބޯތަކެތީގެ ރައްކާތެރިކަން ކަށަވަރުކުރުމަށް ރާއްޖެއިން ކުރާ މަސައްކަތަށް 21.95 މިލިއަން ޑޮލަރު ދޭން އޭޝިއަން ޑިވެލޮޕްމަންޓް ބޭންކް (އޭޑީބީ)އިން ނިންމައިފި އެވެ.

އޭޑީބީން ނިންމާފައި ވަނީ 4 މިލިއަން ޑޮލަރުގެ ލުއި ލޯނެއްގެ އިތުރުން އޭޝިއަން ޑިވެލޮޕްމަންޓް ފަންޑުން އެންމެ ފަގީރު އަދި ތަރައްގީވަމުން އަންނަ ނާޒުކު މެމްބަރު ގައުމުތަކަށް ދޭ 17.95 މިލިއަން ޑޮލަރުގެ ހިލޭ އެހީ ރާއްޖެއަށް ދިނުމަށެވެ.

އެ ބޭންކުން ބުނީ މޫސުމީ ބަދަލުތަކާއި ކާބޯތަކެތީގެ ރައްކާތެރިކަން ކަށަވަރުކުރުމަށް ހިންގާ މި މަޝްރޫއުގެ ދަށުން މޫސުމީ ކާރިސާތަކާ ގުޅިގެން ދުރާލާ އިންޒާރުދިނުމަށް މާލެ އާއި އައްޑޫގައި ގާއިމުކޮށްފައިވާ ނިޒާމުތައް އިތުރަށް ތަރައްގީ ކުރެވޭނެ ކަމަށެވެ.

އެ ސިސްޓަމްތައް އިތުރަށް ތަރައްގީކުރުމުން ރާއްޖޭގެ މޫސުމާ ބެހޭ ގައުމީ އިދާރާ (މެޓް)އަށް ރިއަލް ޓައިމްކޮށް މޫސުމާއި އާލީ ވާނިން ސިސްޓަމް މޮނިޓާ ކުރެވޭނެ އެވެ.

އެ މަޝްރޫގެ ދަށުން ކުޅުދުއްފުށި ސިޓީއަށް ދިމާވާ ފެން ބޮޑުވުމުގެ ހާދިސާތައް މެނޭޖުކުރުމަށް ފެން ހިންދުމާއި ފިލްޓަރޭޝަންގެ ނިޒާމު ގާއިމުކުރާނެ އެވެ. އަދި ކަނޑޫފާގެ ސަރަހައްދުތައް އަލުން އާލާކޮށް ގުދުރަތީ ހައްލުތައް ގެނައުމުގެ އިތުރުން ރަށް ގިރުން ފަދަ ކަންކަން ހުއްޓުވުމަށް އެ މަޝްރޫއުގެ ދަށުން މަސައްކަތް ކުރެވޭނެ އެވެ.

މީގެއިތުރުން ދިގު މުއްދަތަކަށް ކާބޯތަކެތީގެ ރައްކާތެރިކަން ކަށަވަރުކުރަން އެހީވުމުގެ ގޮތުން ކްލައިމެޓް ސްމާޓް އާބަން ފާމިން ޓެކްނޮލަޖީ ތައާރަފުކޮށް އައްޑޫ ސިޓީ އާއި ހދ. އަތޮޅުގައި އެ އެކަން ފެށުމަށް ވެސް ވަނީ ހަމަޖެހިފަ އެވެ.