1993 ވަނަ އަހަރު ނެރުނު ޝާހްރުކް ޚާންގެ މަޝްހޫރު ފިލްމު "ބާޒީގަރް"އަކީ މިއަދާ ހަމައަށް ވެސް އޭނާގެ ކެރިއަރުގައި ފާހަގަކޮށްލެވޭ ފިލްމެކެވެ.

އެ ފިލްމު ނެރުނުތާ ގާތްގަނޑަކަށް 33 އަހަރު ވެފައިވާއިރު ފިލްމުގެ ސީކުއަލްއެއްގެ މަސައްކަތް ފަށާފައިވާ ކަމަށާއި ދެވަނަ ބައެއް ބެލުންތެރިންނާ ހަމައަށް އަންނާނެ ކަމުގެ ޔަގީންކަން އެ ފިލްމުގެ ޕްރޮޑިއުސަރު ރަތަން ޖެއިން ވަނީ ދީފަ އެވެ.

އެގޮތުން ދެވަނަ ބައިގެ މަޝްވަރާތައް ޝާހްރުކް ޚާންއާއެކު މިހާރު ކުރިއަށްދާ ކަމަށް ރަތަންއާ ހަވާލާދީ އިންޑިއާގެ މީޑިއާތަކުން ބުނެ އެވެ.

ދާދި ފަހުން ދިން އިންޓަވިއުއެއްގައި ރަތަން ބުނެފައިވަނީ އެ ފިލްމުގެ ސްކްރިޕްޓް ޝާހްރުކް ޚާންއާ ހިއްސާ ކޮށްފައިވާނެ ކަމަށާއި ފިލްމައިގެން ކުރިއަށްދާނީ ޝާހްރުކް ޚާންއާ އެކުގައި އެކަނި ކަމަށެވެ.

ކާޖަލްއާއި ޝިލްޕާ ޝެޓީ ވެސް ފެނިގެންދިޔަ "ބާޒީގަރް"ގައި ޝާހްރުކް ޚާން ދައްކުވައިދިން ނެގެޓިވް ހީރޯގެ ރޯލަށް ގިނަ ބައެއްގެ ތައުރީފު ލިބުނެވެ.

ބާޒީގަރް އަސްލަކަށް ބަލައިގެން އަސްލަމް ރަޝީދުގެ ސްލޭމަ ސްޓޫޑިއޯއިން ވަނީ ދިވެހި ފިލްމެއް ވެސް ނެރެފަ އެވެ. "ހީލަތް"ގެ ނަމުގައި ނެރުނު އެ ފިލްމުގެ ލީޑު ރޯލުތަކުން ފެނިގެންދިޔައީ ރީކޯ މޫސާ މަނިކުއާއި އައިޝަތު ޝިރާނީ އެވެ.