ހިޔާ ފްލެޓެއްގައި މީހަކު ރަހީނުކޮށް އިނގިލި ބުރިކޮށްލަން އުޅުމުގައި އެ އެޕާޓްމަންޓްގެ ވެރިފަރާތުގެ ބައިވެރިވުން އެބައޮތް ކަމަށް ފުލުހުން ބުނެފި އެވެ.

މިދިޔަ ބުރާސްފަތި ދުވަހުގެ ރޭ ހިޔާ ފްލެޓްގެ އެޕާޓްމަންޓެއްގައި މީހަކު ރަހީނުކޮށް އޭނާގެ ބޯ ބޭލުމަށްފަހު އިނގިލި ބުރިކޮށްލަން އުޅެނިކޮށް ފުލުހުން ވަނީ އެތަނަށް ވަދެ އެކަން ހުއްޓުވައިފަ އެވެ.

ހިޔާގެ H9 ޓަވަރުގެ 20 ވަނަ ފަންގިފިލާގެ 11 ވަނަ އެޕާޓްމަންޓަށް ފުލުހުން ވަންއިރު، އުމުރުން 30 އަހަރުގެ މީހާ އިނީ އެތަނުގެ ބެލްކަނީ ކައިރީގައި ބައިންދާފަ އެވެ.

މިއަދު ބޭއްވި ނޫސްވެރިންގެ ބަައްދަލުވުމެއްގައި ފުލުހުން ބުނީ ފުލުހުން އެތަނަށް ވަންއިރު، އެތަނުގެ ވެރިފަރާތް ކަމަށްވާ ލ. މާވަށް، ޖަމީލާ މަންޒިލް، އާދަމް ހުސައިން، 48، ވެސް އެތަނުގައި ހުރި ކަމަށެވެ. އޭނާ ހިމެނޭހެން އެކަމުގައި ބައިވެރިވި އެންމެން ފުލުހުން ވަނީ ހައްޔަރުކޮށްފަ އެވެ.

ފުލުހުން ބުނީ ފުލުހުންނަށް ފުރަތަމަ މައުލޫމާތު ލިބުނީ ހިޔާ ފްލެޓް ޓަވަރެއްގައި މީހަކު ރަހީނުކޮށްފައި އިން ކަމަށެވެ. އެއީ ކޮން ޓަވަރެއްކަމާއި، ކޮން ފަންގިފިލާއެއްކަން އެވަގުތު ނޭނގޭ ކަމަށް ފުލުހުން ބުންޏެވެ. ސީސީޓީވީ ފްޓޭޖްގެ އެހީގައި އެކަމުގެ ފުރިހަމަ މައުލޫމާތު ހޯދައިގެން 40 މިނިޓްގެ ތެރޭގައި ފުލުހުން ވަނީ ކުށުގެ ވެއްޓަށް ވަދެފަ އެވެ.

ފުލުހުން ބުނިގޮތުގައި އޭނާގެ އިނގިލި ބުރިކޮށްލަން އުޅޭކަމަށް އަނިޔާ ލިބުނު މީހާ އެވަގުތު ބުނި ކަމަށެވެ. އަދި އެވަގުތު އޭނާއަށް ވަނީ ނަފްސާނީގޮތުން ވަރަށް ބޮޑަށް އަސަރުކޮށްފައި ކަމަށް ފުލުހުން ބުންޏެވެ.

އެތަނުގައި ތިބި މީހުންގެ ތެރެއިން އެޕާޓްމަންޓްގެ ވެރިފަރާތް ފިޔަވައި އެހެން އެއްވެސް މީހަކު ކުޑަކަމުދާތަކެތި ދިނުމަށް އެއްބަސްނުވި ކަމަށް ފުލުހުން ބުންޏެވެ. އެތަނުގައި ޖުމްލަ 12 މީހުން ތިއްބެވެ. ވެރިފަރާތް ވަނީ މަސްތުވާތަކެއްޗަށް ޕޮޒިޓިވްވެފައި ކަމަށް ފުލުހުން ބުންޏެވެ.

އެ އެޕާޓްމަންޓުން ބަނގުރަލާއި މަސްތުވާތަކެއްޗާއި ވަޅި އާއި ގިނަ އަދަދެއްގެ ފައިސާ ފެނިފައިވާ ކަމަށް ވެސް ފުލުހުން ބުންޏެވެ.

އެޕާޓްމަންޓްގެ ވެރިފަރާތުގެ އިތުރުން ހައްޔަރުކުރި މީހުން

  • އަލްމަން އަލީ ހާލިދު، 22، ގދ.ވާދޫ/ވެހި
  • މުހައްމަދު އިޒްކާން، 18، މ. ހަތިކަނޑު
  • އިޒާން އަހުމަދު، 18، ޒުނައިޓްވިލާ/ކ. ގުރައިދޫ
  • އަހުމަދު ޒާހިދު، 36، ދަންމަރު/ ށ.ފޯކައިދޫ
  • އިބްރާހީމް ނަޝީދު، 34، ހިޔާލީގުލްޝަން/ލ.އިސްދޫ
  • އަހުމަދު ސަމީހު، 22، ނައިޓްސްޓާ/ބ.ގޮއިދޫ
  • އިސްމާއީލް ވިޝާމް މުހައްމަދު، 29، ވ. ގާމާ
  • ވިޝާމް މުހައްމަދު، 23، ޗިޗަންޑާގެ/ގދ.ވާދޫ
  • ވިސާން މުހައްމަދު، ހިޔާ 03-17-14/ހުޅުމާލެ
  • މުޝްތާގު ޝާކިރު، 37، ޖަނަވަރީގެ/ގދ.ވާދޫ
  • ހަސަން ޣާލިބު، 38، އާރެސް/މ.ކޮޅުފުށި

ފުލުހުން ބުނީ އެ އެޕާޓްމަންޓަކީ މަސްތުވާތަކެތި ގެންގުޅެ ބޭނުންކުރުމުގެ އަމަލުތައް ތަކުރާރުކޮށް ހިންގަމުން އަންނަތަނެއްކަން ފާހަގަކުރެވިފައިވާ ކަމަށެވެ.