އެންޓި ކޮރަޕްޝަން ކޮމިޝަން (އޭސީސީ)އަށް ރައީސް ޑރ. މުހައްމަދު މުއިއްޒު ނުފޫޒު ފޯރުވާ ކަމަށް ކުރީގެ ރައީސް ރައީސް އަބްދުﷲ ޔާމީން އަބްދުލްގައްޔޫމް ތުހުމަތުކުރައްވައިފި އެވެ.

ޕީއެންއެފް އިން މިރޭ ބޭއްވި ޖަލްސާގައި ވާހަކަފުޅުދައްކަވަމުން ޔާމީން ވިދާޅުވީ ރައީސް މުއިއްޒުގެ އެންމެ ބޮޑު އެއް ވައިދަކީ ދައުލަތުން ގެއްލުނު ފައިސާ ހޯދުން ކަމުގައިވާއިރު، އެކަން ކުރަން އެއްވެސް މަސައްކަތެއް ކުރާތަނެއް ނުފެންނަ ކަމަށެވެ.

ޔާމީން ވިދާޅުވިގޮތުގައި ދައުލަތުން ގެއްލުނު ފައިސާ ހޯދައިދިނުމުގެ ވައުދުގައި "އަތްލާން" ރައީސް މުއިއްޒަށް ކެރިވަޑައިނުގަންނަވާނެ ކަމަށެވެ.

ރައީސް މިއިއްޒުގެ މައްޗަށް ތުހުމަތު ކުރެވޭ މައްސަލައެއް ވެސް އެންޓިކޮރަޕްޝަން ކޮމިޝަނަށް ހުށަހެޅިފައިވާ ކަމަށް ޔާމީން ވިދާޅުވި އެވެ. އަދި އެމަނިކުފާނުވެ ގަޓު ހުރިނަމަ އެ މައްސަލަތައް ބެލުމަށް އެ ކޮމިޝަނަށް ޖާގަ ދެއްވުމަށް ޔާމީން ގޮވާލެއްވި އެވެ.

"އަޅުގަނޑު އިލްތިމާސްކުރަން މުއިއްޒަށް އިނގޭތޯ މުއިއްޒަށް ހުށަހެޅިފައި ހުރި ތުހުމަތުތަކުން ބަރީއަވާން އޭސީސީގައި ހުރި މައްސަލަތައް ހިންގެވިޔަ ދޭށޭ. އަދި އެމްއެމްއޭއިން ނެރެފައި ހުރި އެސްޓީއާރުތަކުގެ މައްސަލަ ޕޮލިހުންނަށް ބެލިޔަ ދޭށޭ. ދެން ހަމަ ދޮންއަމާގެ ވީޑިއޯ ނުކުތީމަ އޭސީސީ އެ ވަނީ އެކަމު އޭސީސީއިން ބަލަން ޖެހޭ މާބޮޑެތި މައްސަލަ އެބަހުރި. ދައުލަތުން ގެއްލިފައި ހުރި ފައިސާ ހޯދުމަކީ އޭސީސީގެ އެންމެ ބޮޑު އެއް ޒިންމާ. ދޮންއަމާ ވީޑިއޯ މައްސަލަ ބަލައިގެން ދައުލަތަށް ވަންނާނެ ފައިސާއެއް ނޯންނާނެ،" ޔާމީން ވިދާޅުވި އެވެ.

ރައީސް މުއިއްޒުގެ ދޮންމަންމަ ސްރީލަންކާގެ ރައްޔިތެއްކަމަށްވާ ޖީ ސްކީލާންގެ މައްޗަށް އިންސާނީ ވަގުފާރީގެ ތުހުމަތު އަޅުވައި ރާއްޖެ ނާދެވޭގޮތަށް ޑީޕޯޓްކޮށްލި މައްސަލައާ ގުޅޭގޮތުން އަދަދު ނޫހުން ގެނެސްދިން ތަހުގީގީ ރިޕޯޓަކަށް ނޫސްވެރިކަމުގެ އެވޯޑު ލިބުމުން އެންޓި ކޮރަޕްޝަން ކޮމިޝަނުން ވަނީ މީޑިއާ ކައުންސިލަށް ވަދެެފަ އެވެ.

އެކަމަށް އިޝާރާތް ކުރައްވައި ޔާމީން ވިދާޅުވީ އެއީ އެންޓި ކޮރަޕްޝަން ކޮމިޝަނަށް ސިޔާސީ ނުފޫޒު ވަދެފައިވާ ކަމުގެ ފުރިހަމަ ހެއްކެއް ކަމަށެވެ.

މައްސަލަ ހުށަހެޅީ ކޮންބައެއްކަން ވެސް އޭސީސީއަށް ބުނެދެވިފައިނުވާއިރު، ޖިނާއީ ކުށުގެ ތުހުމަތު ކުރެވޭނެ އަސާސެއް ވެސް އެކަމުގައި އޮތްކަން އެ ކޮމިޝަނަށް ދެއްކިފައެއް ނުވެ އެވެ.

މީޑިއާ ކައުންސިލުންވަނީ އެ ތަހުގީގީ ރިޕޯޓަށް ފަނޑިޔާރުން މާކްސް ދިން ޝީޓްތައް ހާމަކޮށް، އެކަމުގައި ގަވާއިދާ ހިލާފު އެއްވެސް ކަމެއް ހިނގާފައިނުވާކަން ފުރިހަމައަށް ސާބިތުކޮށްދީފަ އެވެ.