ކިއާރާ އަދްވާނީއަކީ މިހާރު ބޮލީވުޑްގައި އަރަމުން އަންނަ ކުޅަދާނަ ތަރި އެކެވެ. އޭނާއަކީ މިހާރުގެ ޒުވާން ތަރިންގެ ތެރެއިން އެންމެ މުއްސަނދި އެއް ތަރިވެސްމެ އެވެ.

އެގޮތުން އޭނާގެ އެންމެ ފަހުގެ ސޯޝަލް މީޑިއާ ޕޯސްޓުގައި މިވަނީ އޭނާގެ އަގުބޮޑު ދިރިއުޅުމުގެ ކުޑަ މިންވަރެއް އާއްމުންނަށް ދައްކާލާފަ އެވެ.

އެ ފޮޓޯގައި ފެންނަނީ ވިދާ ބަބުޅާ ރަން ކުލައިގެ ދަތް އުނގުޅާ ބުރުހެއް ހިފައިގެން މޫނު ދޮންނަ ތަށްޓެއްގެ ކުރިމަތީގައި އޭނާ ހުއްޓިގެން ހުންނަ މަންޒަރެވެ. މޫނު ދޮންނަ ތަށީގެ އިސްކުރު ވެސް ހުރީ ރަން ކުލައިގަ އެވެ.

އެ ފޮޓޯއާއެކު އޭނާ ބުނެފައިވަނީ އޭނާއަކީ "ސިންދީ"އެއްކަން (އިންޑިއާގެ ވަކި ސަރަހައްދަކަށް ނިސްބަތްވާ މީހުން) އެނގޭނީ މިކަންކަމުން ކަމަށެވެ. ސިންދީންނަކީ ވިދާ ބަބުޅާ ތަކެއްޗަށް ލޯބިކުރާ ބައެކެވެ.

ކިއާރާގެ އެ ފޮޓޯއާއެކު އޭނާއަށް ގިނަ ބައެއްގެ ފާޑުކިޔުންތައް ދަނީ އަމާޒުވަމުންނެވެ. އެގޮތުން އެއިން ވެސް އެނގެނީ އޭނާގެ ދެއްކުންތެރިކަން ކަމަށް އެމީހުން ބުނެ އެވެ.

ކިއާރާގެ ފިލްމީ މަސައްކަތްތަކަށް ބަލާއިރު އޭނާ އެންމެ ފަހުން ފެނިގެންދިޔައީ މިދިޔަ އަހަރު ނުކުތް "ސަތުޔާ ޕްރޭމްކީ ކަތާ"އިންނެވެ.