ނިމިދިޔަ އެމެރިކާގެ ރިޔާސީ އިންތިހާބުގައި ހޮލީވުޑްގެ ގިނަ ތަރިންތަކެއް ވަނީ މިހާރުގެ ނައިބު ރައީސް ކަމަލާ ހެރިސްއަށް ތާއީދުކޮށް އޭނާގެ ކެމްޕެއިނުގައި އަމަލީ ގޮތުން ބައިވެރިވެފަ އެވެ.

އެގޮތުން އޭނާއަށް ތާއީދުކުރި ތަރިންގެ ތެރޭގައި އޮޕްރާ ވިންފްރޭ، ޖޯޖް ކްލޫނީ، ޑިއަނާޑޯ ޑިކެޕްރިއޯ، ޓޭލާ ސްވިފްޓް އަދި ބިޔޯންސޭ ހިމެނެ އެވެ.

މީގެ ތެރެއިން ގިނަ ތަރިން ވަނީ ހެރިސްގެ ކެމްޕެއިންގައި ބައިވެރިވުމަށް ރިޝްވަތު ހިފާފައިވާ ކަމަށް އިނގިރޭސި މީޑިއާގައި އަޑު ފެތުރުނެވެ.

މި އަޑުތަކަށް އެންމެ ފަހުން ބިޔޯންސޭގެ މަންމަ މިވަނީ ރައްދު ދީފަ އެވެ. އުމުރުން 70 އަހަރުގެ ޓީނާ ނަވަލްސް ބުނެފައިވަނީ އޭނާގެ ދަރިފުޅަށް ކުރެވޭ ތުހުމަތުތަކަކީ އެއްވެސް އަސާސެއް ނެތް ހަގީގަތާ ހިލާފު ތުހުމަތުތަކެއް ކަމަށެވެ.

ހަބަރުތައް ބުނާ ގޮތުގައި އޮކްޓޯބަރު މަހު އޮތް ހެރިސްގެ އެންމެ ބޮޑު ރެލީގައި ބައިވެރިވުމަށް ބިޔޯންސޭ 10 މިލިއަން ޑޮލަރުގައި ހިފި އެވެ.

އެހެން ނަމަވެސް މިއީ އެއްވެސް ތެދެއް ނަތް ހަބަރުތަކެއް ކަމަށް ޓީނާ އޭނާގެ ސޯޝަލް މީޑިއާގައި އާއްމުކުރި ޕޯސްޓްގައި ބުނެފައިވެ އެވެ.

ހޮލީވުޑްގެ އެހާ ގިނަ ތަރިންގެ ތާއީދާއެކު ވެސް ހެރިސްއަށް ވަނީ އިންތިހާބުގައި ބޮޑު ތަފާތަކުން ނާކާމިޔާބީއާ ކުރިމަތިލާން ޖެހިފަ އެވެ.