ރައްޔިތުންގެ މަޖިލީހުން ގާނޫނުއަސާސީއަށް ގެނައި ބަދަލާއެކު ރާއްޖޭގެ ޑިމޮކްރަސީގެ އިރު އިއްޔެ އޮއްސިއްޖެ ކަމަށް އިދިކޮޅު މައި ޕާޓީ އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެ އެވެ.

ރައްޔިތުންގެ މަޖިލީހުގެ މެމްބަރަކު ނިސްބަތްވާ ޕާޓީއަކުން އެ މެމްބަރަކު ވަކިކޮށްފިނަމަ، ނުވަތަ ޕާޓީ ބަދަލުކޮށްފިނަމަ ގޮނޑިގެއްލޭނެ ކަމަށް ގާނޫނުއަސާސީގައި ހިމަނަން ހުށަހެޅި އިސްލާހު އިއްޔެ ރައްޔިތުންގެ މަޖިލީހުން ފާސްކޮށް ރައީސް ވަނީ ތަސްދީގުކުރައްވާފަ އެވެ.

ރައީސް މުހައްމަދު މުއިއްޒުގެ އެއްގެވުމަށް ކުއްލިގޮތަކަށް އަވަސް އަރުވާލައިގެން އެއް ދުވަހުން ވަނީ ގާނޫނުއަސާސީއަށް ބަދަލުގެނެސްފަ އެވެ.

މިކަމާއި ގުޅިގެން ކަންބޮޑުވުން ފާޅުކޮށް އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޝާހިދު ވިދާޅުވީ، ގާނޫނުއަސާސީގެ މުޅި މަފްހޫމަކީ ރައްޔިތުންނާ މަޝްވަރާ ކޮށްގެން ނިންމުން ކަމަށާއި އެހެންކަމުން އިއްޔެ ގެނައި ބަދަލުތަކާ މެދު ރައްޔިތުން ދެކޭ ގޮތް ހާމަކުރުމުގެ ފުރުސަތު ދޭން ޖެހޭނެކަމަށެވެ.

އިއްޔެގެ އިސްލާހާއެކު ދެ ބާރުގެ ވެރިން ވަކިކުރުމުގެ ބާރު ރައީސުލްޖުމްހޫރިއްޔާ ނަންގަވައިފިކަމަށް ޝާހިދު ވިދާޅުވި އެވެ.

"އިއްޔެ ރައްޔތުންގެ މަޖިލީހުން ފާސްކުރި ގާނޫނުއަސާސުގެ އިސްލާހުތަކަކީ އެއްވެސް ޑިމޮކްރެޓިކް ހަމައަކުން ކޮށްގެން ވާނެކަމެއް ނޫން. އިއްޔެ އިރުއޮއްސުނު ވަގުތު މަޖިލީހު އެ އިސްލާހު ފާސްކުރުމާއެކު، އިރު އަޅުގަނޑަށް ސިފަވެގެން ދިޔައީ ހަމައެކަނި އޮއްސިގެން ދިޔައީ އިއްޔެގެ އިރެއް ނޫންކަން. ރާއްޖޭގެ ޑިމޮކްރަސީގެ އިރުވެސް އިއްޔެ އޮއްސިގެން ދިޔައީ" ޝާހިދު ވިދާޅުވި އެވެ.

ނޫސްވެރިންގެ ބައްދަލުވުމުގައި އެ ޕާޓީގެ ޗެއާޕާސަން ފައްޔާޒު އިސްމާއީލު ވިދާޅުވީ ރާއްޖޭގައި މިވަގުތު އޮތީ ހުދުމުހުތާރު ވެރިކަމެއް ކަމުގެ ސިއްކަ އިއްޔެ ޖެހިއްޖެ ކަމަށެވެ.

"ވަރަށް ސާފުކޮށް މިއަދުގެ ރައީސުލްޖުމްހޫރިއްޔާ ރައްޔިތުންނަށް ދައްކަވައިފި ތިމަންނަ ބޭނުންވާ ގޮތަށް ގާނޫނުއަސާސީ ބަދަލުކުރާނެކަން އަދި ކުރެވޭނެކަން" ފައްޔާޒު ވިދާޅުވި އެވެ.

މި ބައްދަލުވުމުގައި އެމްޑީޕީގެ ޕީޖީ ލީޑަރު އިބްރާހިމް ނާޒިލް ވިދާޅުވީ ގާނޫނުއަސާސީ ބަދަލުކުރުމުގެ މަރުހަލާ ނިމިގެން ދިޔައީ ނުވަ ގަޑިއިރުގެ ތެރޭގައި ކަމަށާއި ވަކި ބޭފުޅަކު ބޭނުންވާ ގޮތަށް މަޖިލިސް ތެރެއިންނާ އެހެނިހެން ގޮތްގޮތުން ވެސް ކަންކަން ކުރަން ޖެހޭ އުސޫލުން ކަންކަން ދިޔުމަކީ ކަންބޮޑުވުމެއް ކަމަށެވެ.

ގާނޫނުއަސާސީއަށް ގެނައި ބަދަލާއެކު ގިނަ ބަޔަކު ދަނީ ސަރުކާރުގެ އަމަލުތަކާއި މެދު ނުރުހުވެ، ފާޑުކިޔަމުންނެވެ.