އިސްލާމީ ތާރީހުގައި ހާއްސަ ގަދަރެއް ދެވިފައިވާ މައްކާގެ ހިރާ ހޮހޮޅައަށް ކޭބަލް ކާރު ދަތުރުތައް ފަށަން ސައޫދީ އަރަބިއާއިން ނިންމައިފި އެވެ.
މައްކާގެ ނޫރު ފަރުބަދައިގެ "ހިރާ" ހޮހޮޅައަކީ އެ ހޮހޮޅައިގައި މީގެ 1400 އެއްހާ އަހަރު ކުރިން ކީރިތި ރަސޫލާ މުހައްމަދު ސައްލައްﷲ އަލައިހި ވަސައްލަމް އިންނަވަނިކޮށް ކީރިތި ގުރުއާނުގެ އެންމެ ފުރަތަމަ އާޔަތްތައް ބާއްވާލެއްވުނު ހޮހޮޅަ އެވެ.
އެ ހޮހޮޅައަކީ މިއަދު ވެސް ހައްޖާއި އުމްރާގެ އަޅުކަމަށް ސައޫދީ އަރަބިއާއަށް ދާ އެތައް މިލިއަން މުސްލިމުންނެއް ޒިއާރަތްކޮށް އަޅުކަމުގައި ވަގުތު ހޭދަކުރާ ހޮހޮޅަ އެކެވެ.
ސައޫދީ އަރަބިއާއިން ބުނީ އެ ހޮހޮޅައަށް ކޭބަލް ކާރުގެ ހިދުމަތް ފެށުމުގެ މަގްސަދަކީ އެތަނަށް އަޅުކަން ކުރަން ދާ މުސްލިމުންނަށް ލުއި ފަސޭހަތައް ހޯދައިދިނުން ކަމަށެވެ.
މި ޕްރޮޖެކްޓްގެ މަސައްކަތް މިހާރު ފެށިފައިވާއިރު ކުރިއަށް އޮތް 2025 ވަނަ އަހަރުގެ ތެރޭގައި އެ ހިދުމަތް ދޭން ފެށޭނެ ކަމަށް ސައޫދީ ސަރުކާރުން ބުނެ އެވެ.
ނޫރު ފަރުބަދައަކީ މަސްޖިދުލް ހަރަމްއާ ހަތަރު ކިލޯމީޓަރު ދުރުގައިވާ 634 މީޓަރު އުސް ފަރުބަދަ އެކެވެ. އެ ފަރުބަދައިގެ އުސްކަމާއި އެ ފަރުބަދައަށް އަރަންޖެހޭ މަގުގެ ސަބަބުން ހިރާ ހޮހޮޅައަށް ޒިއާރަތް ކުރުމަކީ މިހާތަނަށް ވަރަށް އުނދަގޫ ކަމެކެވެ.
އެހެން ނަމަވެސް އަލަށް ތައާރަފް ކުރެވޭ ކޭބަލް ކާރު ހިދުމަތާއެކު ހިރާ ހޮހޮޅައަށް ޒިއާރަތްކުރާ ފަރާތްތަކަށް އިތުރު ލުއި ފަސޭހަތަކެއް ލިބޭނެ ކަމަށް ސައޫދީއިން ބުނެ އެވެ.
