ވެރިކަމަށް ދުވަހަކުވެސް ކުރިމަތި ނުލައްވާނެ ކަމަށާއި އެފަދަ ފުރުސަތެއް ލިބުނަސް އެކަމުން ސަލާމަތްވާނެ ކަމަށް ރައްޔިތުން މަޖިލީހުގެ ރައީސް އަދި ސަރުކާރު ހިންގާ ޕާޓީ ޕީއެންސީގެ ޗެއާޕާސަން އަބްދުއްރަހީމް އަބްދުﷲ ވިދާޅުވެއްޖެ އެވެ.

އަބްދުއްރަހީމް މިހެން ވިދާޅުވީ ރޭ ޕީއެންސީ އޮފީހުގައި ބޭއްވި ނޫސްވެރިންގެ ބައްދަލުމުގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުންނެވެ.

”ދިވެހިރާއްޖޭގެ ވެރިކަމަށް ކުރިމަތިލުމުގެ ވިސްނުމެއް ދުވަހަކު ވެސް ނުގެންގުޅެމޭ. އަދި ކުރިއަށް އޮތްތާގައި ވެސް ނުގެންގުޅޭނަން، ވާދައެއްވެސް ނުކުރާނަން. އަދި އެފަދަ ފުރުސަތެއް ލިބުނަސް އެކަމުން ސަލާމަތްވާނަން،" އަބްދުއްރަހީމް ވިދާޅުވި އެވެ. އަދި އެ ވިސްނުން ދުވަހަކުވެސް ބަދަލު ނުވާނެކަމަށް އަބްދުއްރަހީމް ވިދާޅުވި އެވެ.

މީގެ އިތުރުން އަބްދުއްރަހީމް ވިދާޅުވީ ޕީއެންސީގެ އަސާސީ ގަވައިދު ބުނާ ގޮތުން އޭރަކު އޮންނަ ސަރުކާރެއްގެ ރައީސްއަކީ އެ ޕާޓީގެ މެންބަރެއް ކަމަށްވާ ނަމަ އެ ބޭފުޅަކު ދެވަނަ ދައުރަކަށް ކުރިމަތިލައްވަން ބޭނުން ނަމަ، ޕްރައިމަރީއަކާ ނުލާ ޓިކެޓް ލިބޭނެ ކަމަށާއި އެ އުސޫލުން ރައީސް މުއިއްޒަށް ޕްރައިމަރީއަކާ ނުލާ 2028ގެ ޕީއެންސީގެ ރިޔާސީ ޓިކެޓް ލިބިވަޑައިގަންނަވާނެ ކަމަށެވެ.

ރައީސް މުއިއްޒު އާއި އަބްދުއްރަހީމްގެ ގުޅުން ހީނަރުވެފައިވާކަމަށް ދެކެވޭ ވާހަތަކާއި ގުޅޭގޮތުން އަބްދުއްރަހީމް ވިދާޅުވީ ރައީސް މުއިއްޒުއާއި އޮންނަ ގުޅުމަށް ބަދަލެއް ނާންނަކަމަށާއި ސިޔާސީ ގޮތުން ރައީސް މުއިއްޒުއާ އެންމެ ގާތީ އަދިވެސް އަބްދުއްރަހީމް ކަމަށެވެ.

އަބްދުއްރަހީމް މި މޭރުމުން ވާހަކަ ދެއްކެވިނަމަވެސް އަބްދުއްރަހީމް އާއި ރައީސް މުއިއްޒުގެ ގުޅުން ހީނަރުވެފައިވާ ކަމަށް ޕީއެންސީގެ ބައެއް މެންބަރުންވެސް ދަނީ ބުނަމުންނެވެ. އެގޮތުން އަބްދުއްރަހީމްގެ ނުފޫޒު މާބޮޑަށް ސަރުކާރަށާއި ރައީސަށް ފޯރުވަން މަސައްކަތް ކުރައްވާތީ އަބްދުއްރަހީމްގެ ނުފޫޒު ދައްކުރައްވަން ރައީސް ބޭނުންފުޅުވާކަމަށްވެ އެވެ.

އަބްދުއްރަހީމަކީ ސިޔާސީ ގޮތުން މާ ނުފޫޒުގަދަ ބޭފުޅެއްކަމަށް ރައީސް މުއިއްޒަށް ދެއްކެވުމަށް މަސައްކަތް ކުރައްވަމުން ދާކަމަށްވެސް ރައީސްގެ އަރިސް ބައެއް ބޭފުޅުން ބުނެފައިވެ އެވެ. އަބްދުއްރަހީމް މި ވެރިކަމުގައި ނުފޫޒު ގަދަ ބޭފުޅެއްކަމަށް ދެއްކެވިނަމަވެސް، އެބޭފުޅާއަކީ އެއްވެސް އިރެއްގައި ރައްޔިތުންގެ މާބޮޑު ތާއީދެއް ލިބިވަޑައިގެންނެވި ބޭފުޅެއް ނޫނެވެ. ނަމަވެސް ވެރިކަމަކީ އަބްދުއްރަހީމް އަބަދުވެސް ދެކިލައްވާ ހުވަފެނެއް ކަމަށް އަރިހުގައި އުޅުއްވާ ބައެއް ބޭފުޅުންގެ ފަރާތުން އެނގިފައިވެ އެވެ.