ބޮލީވުޑްގެ މަގުބޫލު ޖޯޑެއް ކަމަށްވާ އަބީޝޭކް ބައްޗަންއާއި އައިޝްވާރްޔާ ރާއީގެ ވަރީގެ އަޑުތައް މީޑިއާގައި ފެތުރެމުން ދަނިކޮށް އަބީޝޭކް އޭނާގެ އަންހެނުންނަށް ހާއްސަ މެސެޖެއް ދީފި އެވެ.

"ދަ ހިންދޫ"އަށް ދިން އިންޓަވިއުއެއްގައި އަބީޝޭކް ބުނެފައިވަނީ ފިލްމީ ދާއިރާގެ މަސައްކަތްތަކުގައި އޭނާ ބުރަކޮށް އުޅޭއިރު އެމީހުންގެ ދަރިފުޅު އާރަދްޔާގެ ކަންތައްތައް ބަލަހައްޓަނީ އައިޝްވާރްޔާ ކަމަށެވެ.

އެއާއެކު އަބީޝޭކް ވަނީ އަނތްބެއް އަދި މައެއްގެ ގޮތުގައި އައިޝްވާރްޔާ އުފުލަމުންދާ ޒިންމާތަކާއި ވެފައިވާ ގުރުބާނީތަކަށް ޝުކުރު ވެސް އަދާކޮށްފަ އެވެ.

"ގޭތެރޭގެ ކަންތައްތައް ދޫކޮށް ފިލްމީ ކަންކަމުގައި އުޅުމުގެ ފުރުސަތު ލިބުމަކީ އަހަންނަށް ލިބިފައިވާ ނަސީބެއް. އެއީ އައިޝްވާރްޔާގެ ސަބަބުން. އެކަމަށް އޭނާއަށް ޝުކުރުވެރި ވެސް ވަން" އަބީޝޭކް ބުންޏެވެ.

2007 ވަނަ އަހަރު ބޭއްވި ކުލަގަދަ ރަސްމިއްޔާތެއްގައި ކައިވެނިކުރި އަބީޝޭކްއާއި އައިޝްވާރްޔާއަށް އާރަދްޔާ ލިބިފައިވަނީ 2011 ވަނަ އަހަރު އެވެ.

އެހެން ނަމަވެސް ބައްޗަން އާއިލާއިން އައިޝްވާރްޔާއަށް ހައްގުވާ އިހުތިރާމާއި ލޯބި ނުލިބޭ ކަމަށް އަބަދުވެސް މީޑިއާގައި ވާހަކަ ދެކެވެ އެވެ. އެ ސަބަބަށްޓަކައި އޭނާއާއި އަބީޝޭކް ވަރިވާން އުޅޭ ކަމަށް ބުނާ ހަބަރުތައް ވެސް ވަނީ ގިނަވެފަ އެވެ.

އެހެން ނަމަވެސް އެ އަޑުތަކާ ބެހޭ ގޮތުން އައިޝްވާރްޔާއާއި އަބީޝޭކް ވެސް މީޑިއާއަށް އެއްވެސް މައުލޫމާތެއް ދީފައެއް ނުވެ އެވެ.