އުނދަގޫ އަހަރަކަށްފަހު ހޮލީވުޑްގެ ތަރި ނިކޯލް ކިޑްމަންއާއި އޭނާގެ ފިރިމީހާ ކެއިތު އާބަންގެ ދިރިއުޅުން އޮސްޓްރޭލިއާއަށް ބަދަލު ކުރަން އުޅޭ ކަމަށް ހަބަރުތައް ބުނެފި އެވެ.

ހޮލީވުޑްގެ މަސައްކަތްތަކުގައި މިވަގުތު އެމެރިކާގެ ލޮސް އެންޖެލަސްގައި ދިރިއުޅެމުން އަންނަ ނިކޯލްއަކީ އޮސްޓްރޭލިއާއަށް އުފަން އެގައުމުގެ ރައްޔިތުކަން އޮންނަ ފަރާތެކެވެ.

މިދިޔަ ސެޕްޓެމްބަރު މަހު ނިކޯލްގެ މަންމަ އޮސްޓްރޭލިއާގައި މަރުވުމުން އޭނާ ވަނީ ޖަނާޒާގައި ބައިވެރިވުމަށް އޮސްޓްރޭލިއާއަށް ދިއުމަށްފަހު އެމެރިކާއަށް އައިސްފަ އެވެ.

އެހެން ނަމަވެސް އެންމެ ފަހުގެ ހަބަރުތައް ބުނާ ގޮތުގައި މިހާރު ނިކޯލްގެ ދިރިއުޅުމުގެ ކަންކަން ހުރި ގޮތުން އޭނާ ބޭނުންވަނީ އޮސްޓްރޭލިއާއަށް ދިރިއުޅުން ބަދަލު ކުރާށެވެ.

މި ނިންމުމުގައި ނިކޯލްގެ ފިރިމީހާ ކެއިތުގެ ފުރިހަމަ އެއްބާރުލުން އޭނާއަށް ލިބޭ ކަމަށްވެ އެވެ. އެގޮތުން ކެއިތު ވެސް އޭނާގެ މިއުޒިކް ޓުއާތައް މެދުކަނޑާލުމަށްފަހު ނިކޯލްއާއެކު ވީހާވެސް ގިނަ ވަގުތު ހޭދަކުރަމުން އަންނަ ކަމަށްވެ އެވެ.

ނިކޯލްގެ ފިލްމީ މަސައްކަތްތަކަށް ބަލާއިރު "ބޭބީގާލް"ގައި ދައްކުވައިދިން އެކްޓިންއަށް ވެނިސް ފިލްމު ފެސްޓިވަލްގައި "ބެސްޓް އެކްޓްރެސް"ގެ އެވޯޑް އޭނާއަށް ދޭން ވަނީ ހަމަޖެހިފަ އެވެ.