ރާއްޖޭ ކައިރީގައި ދެ ކޮޅިގަނޑު އުފެދި، ކުރިއަށް އޮތް 5 ދުވަހު ވައިބާރުވެ ކަނޑު ގަދަވާނެކަމަށް މޫސުމާބެހޭ ގައުމީ އިދާރާ، މޯލްޑިވްސް މީޓިއޮރޮލޮޖިކަލް ސާވިސް (މެޓް އޮފީސް) އިން ބުނެފި އެވެ.

މެޓް އޮފީހުން މިއަދު ބުނީ ރާއްޖޭގެ އިރުން ބޭ އޮފް ބޭންގަލްގައި އުފެދިފައިވާ ކޮޅިގަނޑު ކުރިއަށްއޮތް 24 ގަޑިއިރުތެރޭގައި އިތުރަށް ބާރުގަދަވެ، ބާރުގަދަ ކޮޅިގަނޑަކަށް ބަދަލުވާނެކަމަށް ބެލެވޭކަމަށެވެ. މި ކޮޅިގަނޑު ދަތުރު ކުރަމުންދާނެ ކަމަށް ބެލެވެނީ ހުޅަނގުއުތުރަށް އިންޑިއާގެ ޓެމިލްނާޑް – ސްރީލަންކާ އައްސޭރިފަށާއި ދިމާލަށްކަމަށްވެސް އެ އިދާރާއިން ބުންޏެވެ.

މީގެ އިތުރުން ރާއްޖެއާއި ދުރުން، ރާއްޖޭގެ އިރުދެކުނުގައިވެސް ކޮޅިގަނޑެއް އުފެދިފައިވާކަމަށް މެޓް އޮފީހުން ބުނެ އެވެ.

މި ދެކޮޅިގަނޑާއި ގުޅިގެން 27 ނޮވެމްބަރު ވާ ބުދަ ދުވަހުން ފެށިގެން ކުރިއަށް އޮތް 5 ދުވަހު ރާއްޖޭގެ ސަރަހައްދުގެ އާންމު ވައިބާރުވާނެ ކަމަށް ބެލެވޭކަމަށާއި އާންމު ގޮތެއްގައި ދެކުނުގެ އަތޮޅުތަކަށް ގަޑިއަކު 15 މޭލާއި 25 މޭލާ ދެމެދުގެ ބާރުމިނުގައި އަދި އުތުރާއި މެދުރާއްޖެތެރޭގެ އަތޮޅުތަކަށް ގަޑިއަކު 13 މޭލާއި 23 މޭލާއި ދެމެދުގެ ބާރުމިނުގައި ވައިޖެހޭނެ ކަމަށް ބެލެވޭކަމަށްވެސް އެ އިދާރާއިން ހާމަކޮށްފައިވެ އެވެ.

އެހެންކަމުން ރާއްޖޭގެ ހުރިހާ ސަރަހައްދެއްގެ ކަނޑުތައް ގަދަވާނެކަމަށް ލަފާކޮށްފައިވެ އެވެ. ކަނޑުދަތުރު ކުރުމުގައި މޫސުމަށް ސަމާލުވުމަށް މެޓް އޮފީހުން ވަނީ އިލްތިމާސްކޮށްފަ އެވެ.

ރާއްޖޭގެ އަވަށްޓެރި އިންޑިއާ އާއި ލަންކާއަށްވެސް މި ދުވަސްވަރު ދަނީ ތޫފާނެއްގެ އަސަރުކުރަމުންނެވެ. އެގޮތުން ލަންކާއިން ވެސް ވަނީ މޫސުން ގޯސްވާނެކަމަށް ލަފާކޮށް މޫސުމީ އިންޒާރު ނެރެފަ އެވެ.