އިންޑިއާގެ މުމްބާއީގެ ފަގީރުން ދިރިއުޅޭ ނިކަމެތި ހާލަތު ދައްކުވައިދޭ ކާމިޔާބު ފިލްމު "ސްލަމްޑޯގް މިލިއަނާ"ގެ ދެވަނަ ބައެއްގެ މަސައްކަތް ވަރަށް އަވަހަށް ފަށާނެ ކަމަށް ހަބަރުތައް ބުނެފި އެވެ.

ރިޕޯޓުތައް ބުނާ ގޮތުގައި އެ ފިލްމުގެ މަސައްކަތް ކުރިއަށް ގެންދާނީ ސްވަތީ ޝެޓީއާއި ގްރާންޓް ކެސްމަން ގުޅިގެން ދާދި ފަހުން އުފެއްދި ޕްރޮޑަކްޝަން ހައުސްއަކުންނެވެ.

2005 ވަނަ އަހަރު ނެރުނު ވިކާސް ސްވަރޫޕްގެ ވާހަކަ ފޮތެއްގެ މައްޗަށް ބިނާކޮށް އުފެއްދި "ސްލަމްޑޯގް މިލިއަނާ" ވަނީ ތާރީހުގައި ވެސް އުފެއްދި އެންމެ ކާމިޔާބު އެއް ފިލްމަށެވެ. އެ ފިލްމް ނެރުނީ 2008 ވަނަ އަހަރު އެވެ.

އެ ފިލްމުގައި ދައްކުވައިދެނީ މުމްބާއީގެ ވަރަށް އާދައިގެ އަވަށެއްގެ ޖިފުޓިއެއްގައި ދިރިއުޅުނު އުމުރުން 18 އަހަރުގެ ޖަމާލް މަލިކްގެ ހަޔާތުގެ ވާހަކަ އެވެ.

ގްރާންޓްގެ ފަރާތުން ނެރުނު ބަޔާނެއްގައި ބުނެފައިވަނީ ބައެއް ވާހަކަތަކަކީ އެ ވާހަކަތައް ކިޔައި ނިމުމަށްފަހު ވެސް އަހަރުމެންގެ ހިތުގައި ބިންވަޅު ނެގިފައިވާ ވާހަކަތަކެއް ކަމަށާއި "ސްލަމްޑޯގް މިލިއަނާ"އަކީ އެފަދަ ވާހަކައެއް ކަމަށެވެ.

"ސްލަމްޑޯގް މިލިއަނާ"އަށް 2009 ވަނަ އަހަރު 8 އެކަޑަމީ އެވޯޑާއި ހަތް ބާފްޓާ އެވޯޑުގެ އިތުރުން ހަތަރު ގޯލްޑަން ގްލޯބް އެވޯޑް ލިބިފައިވެ އެވެ.